მთავარი არხის გენერალური დირექტორის, ნიკა გვარამიას თქმით, უცნობმა წყარომ ზუგდიდში ბანკის მძარცველის ვინაობა დაუსახელა და ორი ყალბი მძევალი ამოიცნო. მთავარი არხის განცხადებით, გვარამიას წყარომ ჯერ კიდევ გუშინ, 21 ოქტომბერს დაურეკა, თუმცა ინფორმაცია სპეციალურად არ გაასაჯაროვეს.

როგორც გვარამია ყვება, უცნობმა წყარომ მას დაურეკა და მძარცველის სახელი და გვარი შეატყობინა. ამასთან, უთხრა, რომ მძევლებს შორის ორი მძარცველის თანამზრახველი იყო და ისინი მოქმედი ჯარისკაცები არიან. მისივე ინფორმაციით, წყარომ შეატყობინა, რომ ვერტმფრენი სვანეთში გადასაფრენად სჭირდებოდათ, საიდანაც შემდეგ სახმელეთო გზით რუსეთში გადავიდოდნენ.

ტელეკომპანიამ გაავრცელა აუდიოჩანაწერი, როგორ უკავშირდება გვარამია 112-ს და ამ ინფორმაციას აწვდის. ჩანაწერიდან ისმის, რომ 112-ის თანამშრომელი ადგილზე პოლიციის მისვლას და მის გამოკითხვას სთავაზობს. მთავარ არხში ამბობენ, რომ ნიკა გვარამიასთან გამოკითხვისთვის არავინ მისულა, რის შემდეგაც იგი შინაგან საქმეთა სამინისტროს საზოგადოებასთან ურთიერთობის დეპარტამენტის უფროსს, ნინო გიორგობიანს დაუკავშირდა და სპეცოპერაციაზე ინფორმაცია მიაწოდა.

"მძევლები კი არა, სწორედ ეს ფეიკ მძევლები გაიყოლა. წაღებულია 4 მილიონი დოლარი და არა ნახევარი მილიონი. არავითარი კირცხის ტყე, მოგონილი ლოკაციაა, საქართველო დატოვეს მარშრუტით წალენჯიხა-ჩხოროწყუ-ლებარდე-ტობავარჩხილი-სვანეთი-აფხაზეთი" — წერს გვარამია ფეისბუქზე.

გვარამია აღნიშნავს, რომ წყაროს თქმით, მძარცველს იქ კონკრეტული პირი უნდა დახვედროდა, რომელსაც ფულს გაუყოფდნენ, ის კი მისცემდა გარანტიებს, ყალბ პასპორტებს და უზრუნველყოფდა გადაყვანას რუსეთში.

გვარამია 21 ოქტობერს წერდა, რომ ბანკის ძარცვაზე ინფორმაციას ფლობდნენ, თუმცა პოლიციის თხოვნით, არაფერს არ იტყოდნენ, თუმცა მომდევნო დღეს ინფორმაციას გააჟღერებდნენ.

მძევლების შესახებ ინფორმაციის გადასამოწმებლად On.ge ცდილობს, თავდაცვის სამინისტროს დაუკავშირდეს.