თბილისის მერია რაგბის სავარჯიშო კომპლექსის მოსაწყობად 6 932 651 ლარს ხარჯავს. სტადიონი გლდანის რაიონში, მუხიანის IV მ/რ-ის მიმდებარედ შენდება. ხელშეკრულება შპს საბა კონტრაქშენთან 2016 წლის 18 მაისს გაფორმდა.

ხელშეკრულების მიხედვით, გამარჯვებულ კომპანიას სატენდერო პირობებით გათვალისწინებული სტადიონი ხელშეკრულების გაფორმებიდან 270 დღეში უნდა ჩაებარებინა, რაც თებერვალში (ზამთარში) იწურება. თუმცა, თბილისის მერიის მიერ 9 იანვარს გავრცელებული პრესრელიზის მიხედვით, სტადიონის მოწყობა 2017 წლის გაზაფხულზე დასრულდება. მშენებლობის დასრულების კონკრეტული თარიღი მითითებული არაა.

შპს საბა კონტრაქშენი ერთადერთი კომპანია არ იყო, რომელიც ამ ტენდერში მონაწილეობდა. მან თავის ერთ-ერთ კონკურენტზე შპს ალიანსი-ზე, 1 ლარით ნაკლებად შესთავაზა მერიას სამუშაოს შესრულება და ხელშეკრულებაც გააფორმა. თუმცა, ხელშეკრულებაში ცვლილება 2-ჯერ შევიდა და სტადიონის ასაშენებლად გამოყოფილი თანხა 10 პროცენტით, 630 152 ლარით გაიზარდა. თანხის ცვლილება სტადიონის პროექტში შეტანილი ცვლილებითაა დასაბუთებული.

იმის მიუხედავად, რომ საბოლოო შეთანხმებით სტადიონის ღირებულება 630 152 ლარით გაძვირდა, მერიამ 9 იანვარს გავრცელებულ პრესრელიზში ხელშეკრულებაში თანხის ცვლილებამდე არსებული მონაცემი - 6 302 500 ლარი მიუთითა.

თბილისის მერიას სტადიონის საბოლოო ღირებულებაზე - 6 932 651 ლარზე იაფად მომსახურებას სთავაზობდნენ: ალიანსი, თბილი სახლი, ელექტრო მონტაჟ სერვისი და დაგი.

ხელშეკრულება, რომლიც შპს საბა კონტრაქშენთან დაიდო გათვალისწინებულია: ბუნებრივი ბალახის მოედნის მოვლა-პატრონობაზე მაღალკვალიფიციური სპეციალისტის მომზადება და ზედამხედველობა მინიმუმ 1 წლის განმავლობაში.

როგორც თბილისის მერიის მიერ გავრცელებულ პრესრელიზში წერია, სავარჯიშო კომპლექსში ოთხი მოედანი განლაგდება: ერთი ბუნებრივსაფარიანი, ორი ხელოვნური და ერთიც ქვიშის. კომპლექსში გათვალისწინებულია სავარჯიშო დარბაზის მშენებლობაც და 1 000 გულშემატკივარზე გათვლილი ტრიბუნა. გარდა ამისა, სავარჯიშო კომპლექსს ექნება საკუთარი პარკინგის ზონა.