"ბავშვი არ მიჯერებს ისე, როგორც შენ უჯერებ ბოკერიას" - ასე მიმართა ნიკა მელიამ სერგო რატიანს, რასაც ნაციონალური მოძრაობის წევრებს შორის დაპირისპირება მოჰყვა.

სხდომა გადაიდო, მელია ჯერ-ჯერობით ისევ ფრაქციის თავმჯდომარეა.

დაპირისპირებულთა მეორე მხარეს იყო ელენე ხოშტარია, სერგო რატიანთან და აკაკი ბობოხიძესთან ერთად. ხოშტარიას თქმით, პარტია უკვე გახლეჩილია:

"დღეს ჩვენ კარგად დავინახეთ, სამწუხაროდ, ადამიანები, რომლებიც თითქოსდა ლაპარაკობდნენ პარტიის ერთიანობაზე, ან ნაციონალური მოძრაობის იდეებზე, აწყობენ შოუს საკუთარ პარტიაში, საკუთარ ფრაქციაში. ელაპარაკებიან ბრიფინგებით საკუთარ თანამებრძოლებს და თანაპარტიელებს. ეს მეტყველებს იმაზე, რომ არაფერი გარდა იმისა, რომ გახლიჩონ პარტია, რაც ფაქტიურად უკვე შემდგარია, მათ არ ამოძრავებთ."

დღეს, 9 იანვარს, ენმ-ის საპარლამენტო ფრაქციის სხდომა უნდა გამართულიყო. ფრაქციის წევრებს უნდა ემსჯელათ, დარჩებოდა, თუ არა ნიკა მელია თავმჯდომარედ.

ერთიანი ნაციონალური მოძრაობის ცნობით, სხდომის გადადება გიგი უგულავას ინიციატივით მოხდა.

“მე ვთხოვე ფრაქციის წევრებს კონსულტაციებისთვის სამი დღე და გადაწყვეტილებას ფრაქცია ამ ვადის ამოწურვის შემდეგ მიიღებს”,- განაცხადა გიგი უგულავამ.