ბოლნისის მუნიციპალიტეტის სოფელ ნახიდურში გაერთიანებული ოპოზიცია ძალა ერთობაშიას კანდიდატის, კახა ოქრიაშვილის შტაბის წევრ ლევან მიქელაძეს თავს დაესხნენ. ადგილობრივ შტაბში On.ge-ს განუცხადეს, რომ მიქელაძეს სოფელ მუხრანიდან ორი ავტომანქანით აედევნენ და დაპირისპირება ნახიდურში გაგრძელდა. ელგუჯა ჯაფარიძის თქმით, დამტვრეულია მანქანა, იყო გასროლაც, რის შედეგადაც ტყვია ავტომობილის უკანა ბამპერს მოხვდა.

"დამტვრეულია მანქანა, იყო გასროლაც. ქართული ოცნების აქტივისტები იყვნენ. ეს პირველი შემთხვევაა არაა და ერთი თვეა მიმდინარეობს ასეთი დაშინებები და ზეწოლები", — ამბობს ელგუჯა ჯაფარიძე.

შინაგან საქმეთა სამინისტროში On.ge-ს უთხრეს, რომ საქმეზე გამოძიება სისხლის სამართლის კოდექსის ორი —187 და 236 მუხლით მიმდინარეობს, რაც ნივთის დაზიანებას ან განადგურებასა და ცეცხლსასროლი იარაღის მართლსაწინააღმდეგო შეძენა, შენახვა, ტარება, დამზადება, გადაზიდვა, გადაგზავნა ან გასაღებას გულისხმობს.

On.ge მომხდართან დაკავშირებით ქართული ოცნების პრესსამსახურს დაუკავშირდა, სადაც გვითხრეს, რომ საკითხს მოიკითხავენ და საჭიროების შემთხვევაში დაგვირეკავენ. მათ პასუხს მიღებისთანავე შემოგთავაზებთ.