ევროპული საქართველოს წევრები, გიორგი კანდელაკი და მაია კაციტაძე აცხადებენ, რომ ამბროლაურში მუნიციპალურის ააიპ-ების თანამშრომლებზე ზეწოლაზე მიმდინარეობს.

როგორც მაია კაციტაძემ განაცხადა, ამბროლაურში ააიპ-ების დირექტორებს დაევალათ სპეციალური ცხრილის შევსება, სადაც თანამშრომლების პერსონალურ ინფორმაციასთან ერთად, უნდა დაეწერათ, ვის აძლევენ ისინი ხმას.

"ნებისმიერი სამსახურის მიერ თანამშრომლების აღწერა პოლიტიკური გემოვნების მიხედვით, არის უფლებამოსილების ბოროტად გამოყენება. სწორედ ასეთი საქმიანობითაა დაკავებული ამბროლაურის მერია. 12 ოქტომბერს, საგანგებო შეხვედრების შემდეგ, ყველა ააიპ-ის დირექტორს დაევალა სპეციალური ცხრილის შევსება, სადაც მითითებული უნდა იყოს თანამშრომლის სახელი, გვარი, თანამდებობა, ტელეფონის ნომერი, რომელ მაჟორიტარობის კანდიდატს აძლევს ხმას და რომელ პარტიას. ეს უბრალოდ კრიმინალია", — განაცხადა კაციტაძემ.

გიორგი კანდელაკის თქმით, საჯარო მოხელეთა დიდი ნაწილი ქართულ ოცნებას ხმას მაინც არ მისცემს. დეპუტატი აღნიშნავს, რომ სიაში ფიგურირებენ დამლაგებლებიც და ზეწოლა მათზეც ხორციელდება.

"ამბროლაურშიც, წყალტუბოშიც, სადაც მე ვაწარმოებ ევროპული საქართველოს კამპანიას და სხვაგანაც, მუნიციპალური ააიპები სავსეა წერა-კითხვის უცოდინარი ადამიანებით, რომლებმაც არც კი იციან, რაში იღებენ ხელფასს. ამავე დროს, კეთილსინდისიერ თანამშრომლებზე ამხელა ზეწოლაა, რისი არსებობა სწორედაც ოცნების ნერვიულობაზე მიუთითებს და მათ გარდაუვალი მარცხისგან ვერ იხსნის", — აცხადებს კანდელაკი.

On.ge დაუკავშირდა ამბროლაურის მერს, ზვიად (დავით) მხეიძეს, რომელმაც განაცხადა, რომ ამ ბრალდების შესახებ პირველად გაიგო, თუმცა ბრიფინგს ნახავს და "სიტუაციასაც გაარკვევს".