Showtime-მა უსირცხვილოს (Shameless) ფინალური მე-11 სეზონის პრემიერის თარიღი დააანონსა. მაყურებელი 2011 წელს დაწყებული ბევრისთვის ძალიან საყვარელი სერიალის ბოლო სეზონს 2020 წლის 6 დეკემბრიდან იხილავს.

უსირცხვილო Showtime-ის ისტორიაში ყველაზე გრძელი მხატვრული სერიალია. თავდაპირველად სერიალში მთავარი როლი ემი როსუმს ეკავა, თუმცა მე-9 სეზონის შემდეგ მან შოუ დატოვა. Shameless-ის უკანასკნელი სეზონი ამ ზაფხულს უნდა გამოსულიყო, თუმცა COVID-19-ის პანდემიის გამო ის გადაიდო და საბოლოოდ ამ წლის დეკემბერში იხილავს დღის სინათლეს.

შოუს ფინალურ სეზონში მთავარი პერსონაჟები COVID-19-ის ლეტალურ პანდემიას შეეჭიდებიან. მე-11 სეზონი ასევე ჯენტრიფიკაციასა და დროის მსვლელობის მიღებაზე ფოკუსირდება. ფრენკი საკუთარ მორალს აყენებს ეჭვქვეშ, ლიპი კი ცდილობს, იმას შეეგუოს, რომ ოჯახის ახალი უფროსია. იენი და მიკი თავიანთი მატრიმონიალური მოვალეობების გამორკვევას ცდილობენ, დები კი საკუთარ ინდივიდუალურობას აღიარებს და მარტოხელა დედობას ითავებს. კევინი და ვი საუზ-საიდში ცხოვრების სირთულეებს განიხილავენ, ამასობაში კი კარლი მოულოდნელად სამართალდამცავ ორგანოში იწყებს მუშაობას.

ფანებს, ცხადია, ძალიან ბევრი დააკლდებათ, როდესაც უსირცხვილო Showtime-ს დატოვებს, თუმცა შოუს გადადებული ფინალი საკმაოდ დროული და ლოგიკურია. ოჯახში არსებულ პრობლემებთან დაპირისპირებების შემდეგ გალაგერების ოჯახი სრულიად ახალი გამოწვევის წინაშეა, რომელიც დღეს უკვე მაყურებლებისთვისაც ძალიან კარგადაა ნაცნობი.

ფოტო: Showtime