საქართველოს საპატრიარქოში აცხადებენ, რომ 14 ოქტომბერს სვეტიცხოვლობის დღესასწაულზე მისულ მრევლს თერმოსკრინინგს ჩაუტარებენ. მათ მიერ გავრცელებულ განცხადებაში, ასევე, წერია, რომ აუცილებელია ყველას ჰქონდეს პირბადე და დაცული იყოს დისტანცია. საპატრიარქოში, აგრეთვე, აღნიშნავენ, რომ ტაძართან მისასვლელად მანქანის საშვები არ იქნება საჭირო.

"13 ოქტომბერს ლოცვა დაიწყება 17:00 საათზე, ხოლო 14 ოქტომბერს — 10:00 საათზე", — განმარტავენ საპატრიარქოში.

კორონავირუსის პანდემიის პირველ ტალღაზე, მაშინ, როცა დაავადებათა კონტროლის ეროვნული ცენტრის ხელმძღვანელები მთელ საზოგადოებას, მათ შორის მრევლს ეკლესიაში მისვლისგან თავის შეკავებისკენ მოუწოდებდნენ, ეკლესიების ნაწილი და საპატრიარქოს პოზიცია იყო, რომ ეკლესიებში სააღდგომო ლიტურგიები მაინც ჩატარებულიყო. მიუხედავად იმისა, რომ ქვეყანაში მკაცრი საკარანტინო წესები მოქმედებდა, მთავრობამ ეკლესიებს წირვა-ლოცვის ჩატარების ნება დართო და საქართველოში მოქმედი ეკლესიების ნაწილში სააღდგომო ლიტურგიები მაინც ჩატარდა. ხელისუფლებისა და საპატრიარქოს შეთანხმების მიხედვით, მსურველები ეკლესიებში 21:00 საათამდე უნდა მისულიყვნენ და 06:00 საათამდე უნდა დარჩენილიყვნენ.