რეფორმერის მაჟორიტარი დეპუტატობის კანდიდატი მცხეთა-მთიანეთი-დუშეთის და ყაზბეგის საარჩევნო ოლქში ბაჩო ბუჩუკური რეგიონის მოსახლეობას კარდაკარის პრინციპით ხვდება. მან შეხვედრები გამართა ყაზბეგსა და დუშეთში, სადაც ერთ-ერთი ყველაზე დიდი პრობლემა ჯანდაცვის სერვისებზე ხელმისაწვდომობაა. როგორც ბაჩო ბუჩუკური აცხადებს, ადგილობრივი მოსახლეობა დარჩენილია სამედიცინო მომსახურების გარეშე და რეგიონში არსებული სამედიცინო დაწესებულება ვერ უზრუნველყოფს მოსახლეობას სამედიცინო სერვისებით.

"კარდაკარის პრინციპით მოსახლეობასთან შეხვედრისას გამოიკვეთა ის პრობლემები, რაც ადგილობრივებს აქვთ. მძიმე ეკონომიკური და სოციალური ფონი, უმუშევრობა, გაჩერებული ტურისტული სექტორი არის რეგიონის მთავარი გამოწვევები. ამას გარდა, ის, რაც ადგილობრივ მოსახლეობას ყველაზე მეტად აწუხებს, ჯანდაცვაა. აქაურებს არ აქვთ წვდომა სამედიცინო სერვისებზე. რეგიონში ფუნქციონირებს ორი სამედიცინო დაწესებულება, ყაზბეგში და დუშეთში, რომლებიც ვერ აკმაყოფილებს მოსახლეობის მოთხოვნებს.

ჩვენი რეგიონი გამოირჩევა სპეციფიკური რელიეფით, აქედან გამომდინარე, ადამიანებს უჭირთ დროულად საავადმყოფომდე მისვლა, მით უმეტეს, რომ ერთადერთი თანამედროვე სტანდარტის სამედიცინო დაწესებულება არის სტეფანწმინდაში. ფასანაურში ან სხვა ტერიტორიაზე მცხოვრები ადამიანისთვის, რომელსაც ჯანმრთელობის პრობლემა აქვს, სტეფანწმინდამდე ჩასვლა რთულია. სავალალო მდგომარეობაშია დუშეთის საავადმყოფო, რომელიც ელემენტარულ ნორმებს ვერ აკმაყოფილებს. რეგიონში ძალიან ცუდად მუშაობს სასწრაფო სამედიცინო დახმარების სამსახური, რაც ცოტა ხნის წინ შატილის გზაზე დატრიალებული ტრაგედიის დროსაც გამოჩნდა.

ადგილობრივი მოსახლეობის მოთხოვნაა რეგიონში შეიქმნას ჯანდაცვის გამართული ინფრასტრუქტურა. სასწრაფო სამედიცინო სამსახურს დაემატოს ახალი ბრიგადები, გაკეთდეს სოფლის ამბულატორიები, სადაც მოსახლეობა შეძლებს პირველადი სამედიცინო დახმარების მიღებას. ჩვენ ყველა ვალდებული ვართ, ჩვენი ქვეყნის მოქალაქეებს შევუქმნათ ისეთი პირობები, რომ ადამიანებს ჰქონდეთ ღირსეული ცხოვრების და ჯანმრთელობის დაცვის უფლება", — აღნიშნავს პარტია რეფორმერის მაჟორიტარი დეპუტატობის კანდიდატი მცხეთა-მთიანეთი-დუშეთის და ყაზბეგის საარჩევნო ოლქში ბაჩო ბუჩუკური.