ბელარუსის შინაგან საქმეთა სამინისტროში აცხადებენ, რომ საჭიროების შემთხვევაში დემონსტრანტების წინააღმდეგ საბრძოლო იარაღს გამოიყენებენ. ამის შესახებ ვიდეომიმართვაში შინაგან საქმეთა მინისტრის მოადგილემ, გენადი კაზაკევიჩმა ისაუბრა.

კაზაკევიჩის მტკიცებით, საპროტესტო მოძრაობა მცირდება, თუმცა უფრო რადიკალური ხდება, ხოლო ბოლო დღეებში განვითარებულ მოვლენებს "სამოქალაქო პროტესტთან არანაირი კავშირი არ აქვს". მისივე თქმით, ამის უკან დგანან ძალები, რომელთაც სურთ ქვეყანა 90-იან წლებში დააბრუნონ.

"შინაგან საქმეთა სამინისტროს ორგანოების თანამშრომლები და შიდა ჯარების სამხედრო მოსამსახურეები ქუჩებიდან არ გავლენ და აუცილებლობის შემთხვევაში სპეციალურ საშუალებებსა და საბრძოლო იარაღს გამოიყენებენ", — განაცხადა მან.

პოლიტიკური დაძაბულობა ბელარუსში ისევ გერძელდება. 9 აგვისტოს ჩატარებულ საპრეზიდენტო არჩევნების შედეგებს მოსახლეობა არ აღიარებს. დემონსტრანტები პრეზიდენტ ალექსანდრ ლუკაშენკოს გადადგომასა და ხელახალი არჩევნების ჩატარებას მოითხოვენ. ადგილობრივი საარჩევნო კომისიის მიერ გამოქვეყნებულ არჩევნების შედეგებს გაერთიანებული ოპოზიციის კანდიდატი, სვეტლანა ტიხანოვსკაიაც არ ეთანხმება, რომელიც შედეგების გამოცხადების შემდეგ იძულებული გახდა, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.

ევროპარლამენტმა ბელარუსში აგვისტოში ჩატარებულ არჩევნებს გაყალბებული უწოდა და არ აღიარა. ევროპარლამენტის თქმით, ლუკაშენკოს 5 ნოემბრიდან, როცა მისი უფლებამოსილების ვადა ამოიწურება, პრეზიდენტად აღარ აღიარებენ.