ვაშინგტონის კანაფის კოალიცია, ტრამპის ინაუგურაციის დღეს, მარიხუანის ათასობით გახვეული ღერის დარიგებას აპირებს, თანაც უფასოდ. კოალიცია მარიხუანის ფედერალურ დონეზე ლეგალიზებას მოითხოვს. ინფორმაციას ამის შესახებ USA Today ავრცელებს.

"მთავარი მესიჯი არის, რომ დროა, მარიხუანის ლეგალიზება ფედერალურ დონეზე მოხდეს" - განაცხადა DCMJ-ის დამფუძნებელმა, ორგანიზაციის, რომელიც ლობირებდა ინიციატივა 71-ის მიღებას ვაშინგტონში. ინიციატივა 71 57,2 გრამის ან ნაკლები მარიხუანის ფლობის, მისი მოყვანისა და გასხვისების ლეგალურობას გულისხმობს, თუმცა გაყიდვა არალეგალურია.

ორგანიზაციის დამფუძნებელი ღელავს, რომ მიღწეული პროგრესი ტრამპის ადმინისტრაციის პირობებში დაიკარგება. განსაკუთრებით აშშ-ის არჩეული პრეზიდენტის გადაწყვეტილების გამო, რომლის მიხედვით, იუსტიციის მინისტრად ჯეფ სეშენსი უნდა დაინიშნოს:

"მან ჯერ კიდევ აპრილში განაცხადა, არსებული კანონის შენარჩუნებას გეგმავს. მან თქვა, რომ მარიხუანა საშიშია."

მარიხუანის დარიგება ლეგალურია მანამ, სანამ ეს ვაშინგტონის მიწაზე ხდება. იქნება 4 200 საჩუქარი, ტრამპის სიტყვით გამოსვლის მე-4 წუთსა და 20 წამზე (420 საერთაშორისოდ ცნობილი კოდია, რომელიც მარიხუანას აღნიშნავს) აქციის მონაწილეები ერთად მოუკიდებენ. ეს ნაწილი კი ლეგალური ნამდვილად არ არის.

"გავაფრთხილებთ, რომ თუ მოწევენ დაპატიმრების რისკი არსებობს, ეს სამოქალაქო დაუმორჩილებლობის ფორმაა. ვფიქრობ, ეს კარგი პროტესტია." განაცხადა ორგანიზაციის დამფუძნებელმა. მისივე თქმით, ეს ტრამპის საწინააღმდეგო ღონისძიება არ არის და არც ცერემონიის ჩაშლის მცდელობაა.

ვაშინგტონის კანაფის კოალიცია იმედოვნებს, რომ ახალი ადმინისტრაცია პრობლემებს არ შექმნის, თუმცა ყველაზე ცუდისთვის ემზადება.