საზოგადოებრივი მაუწყებლისა და Nova Productions-ის ახალი ფსიქოლოგიური დრამის, სეანსის პირველი თიზერი გამოვიდა. სატელევიზიო შოუ HBO-ს ამერიკული სერიალის, In Treatment-ის ქართული ანალოგი იქნება.

სერიალში მთავარ როლს რეზო ჩხიკვიშვილი ასრულებს, როგორც თიზერიდან ვიგებთ, სწორედ ის იქნება ფსიქოთერაპევტის როლში. შოუში ასევე მონაწილეობენ ნინო კასრაძე, ია სუხიტაშვილი, მიშა გომიაშვილი და ნატალია ყულოშვილი. სეანსის პრემიერა პირველ არხზე ნოემბერში შედგება.

ემისა და ოქროს გლობუსის მფლობელი In Treatment ერთ-ერთი ყველაზე გავლენიანი ამერიკული სატელევიზიო არხის, HBO-ს ცნობილი სერიალია. მისი პრემიერა 2008 წელს შედგა და ის ფსიქოთერაპევტი პოლ უისტონის შესახებ მოგვითხრობს. უისტონს ყოველკვირეული სეანსები აქვს თავის პაციენტებთან და სწორედ ამ დროს მაყურებლები არაერთი პერსონაჟის სხვადასხვა ყოველდღიური პრობლემის სიღრმისეულ მიზეზებს კარგად ეცნობიან.

სწორედ In Treatment-ის ქართული ანალოგი იქნება სეანსი. პირველმა არხმა ახალი სერიალის გადაღება ჯერ კიდევ იანვარში დააანონსა. სერიალის ქართულ ვერსიაშიც გამოკვეთილი იქნება ისეთი თემები, როგორიცაა ოჯახური პრობლემები, დეპრესია, ბულინგი, ჰომოფობია და ა.შ. შესაბამისად, განსაკუთრებით საინტერესოა, თუ როგორ მოხდება ამ თემების რეპრეზენტაცია ქართულ შოუში.

ორიგინალი სერიალი სულ სამი სეზონის განმავლობაში გაგრძელდა და 2010 წელს დასრულდა. ქართული ტელევიზიები სხვადასხვა საერთაშორისო პროექტების ადგილობრივ ვერსიებს ხშირად ქმნიან: მაგალითად ნიჭიერი, მასტერშეფი, ახალი ხმა... საინტერესოა, თუ როგორ გაამართლებს ამჯერად მსოფლიოში ცნობილი სერიალის ქართული ანალოგი.