აჭარაში დააკავეს პირი, რომელიც ყავას სხვისი სასაქონლო ნიშნით აფასოებდა და ყიდდა. ინფორმაცია ამის შესახებ საქართველოს ფინანსთა სამინისტროს საგამოძიებო სამსახურმა გაავრცელა.

უწყების ცნობით, ამოღებულია სხვისი სასაქონლო ნიშნის გამოყენებით დამზადებული დიდი ოდენობით მზა პროდუქცია და მის დასამზადებლად განკუთვნილი პოლიგრაფიული მასალა.

სამინისტროს ინფორმაციით, საქმეზე გამოძიება საქართველოს სისხლის სამართლის კოდექსის 196-ე მუხლის პირველი ნაწილით მიმდინარეობს, რაც გულისხმობს სასაქონლო (მომსახურების) ნიშნის ან სხვა კომერციული აღნიშვნის მართლსაწინააღმდეგო გამოყენებას და სასჯელის სახით 2 წლამდე ვადით თავისუფლების აღკვეთას ითვალისწინებს.