"მე სამ წლამდე ვწოვდი დედის ძუძუს და შეიძლება, 200 ლიტრის გადამეტება მომივიდა და ესეც მიაწერეთ ხელფასს", — ამ სიტყვებით გამოეხმაურა ლეიბორისტული პარტიის ლიდერი, შალვა ნათელაშვილი რუსთავი 2-ის ანონსს, რომელშიც საუბარი იყო, რომ არჩევნების შემდეგ პარლამენტში არ უვლია, თუმცა ხელფასს მაინც იღებდა.

ხელფასის აღებასთან დაკავშირებით მას კითხვები დაუსვეს გადაცემა ღამის კურიერში. როგორც ნათელაშვილი განმარტავს, 2008 წლის არჩევნების შემდეგ მისი პარტია ბოიკოტის რეჟიმში იყო და საპარლამენტო აქტივობებს საზოგადოებაში ეწეოდნენ.

"დღეს საქართველოს საპარლამენტო ოპოზიცია სხდომებზე არ დადის, ბოიკოტი აქვთ გამოცხადებული ხელფასს იღებენ. მსოფლიოში დეპუტატები აცხადებენ ბოიკოტებს, სხვა საქმიანობას ეწევიან გარეთ ამომრჩევლებთან, იბრძვიან, მიტინგებს, აქციებს აწყობენ, მაგრამ არ შედიან სხდომებზე პოლიტიკური მოტივით. რა ჩავიდინეთ ისეთი ცოდვა, რომ ვეღარ მივიღეთ ამნისტია", — განაცხადა შალვა ნათელაშვილმა.