თავდაცვის სამინისტროს განცხადებით, ჯარისკაცი, რომლის ცემის შესახებ მედიაში ინფორმაცია გავრცელდა, ამბობს, რომ დაზიანებები წყლის არხში ჩავარდნის შედეგად მიიღო. უწყებაში აცხადებენ, რომ პირველი ქვეითი ბრიგადის ერთ-ერთმა სამხედრო მოსამსახურემ დაზიანებები არასამსახურებრივ პირობებში, დასვენების დროს მიიღო, რის გამოც საავადმყოფოში მოხვდა.

"თავად დაშავებული სამხედრო მოსამსახურის განმარტებით, ის იმყოფებოდა მეგობრის წვეულებაზე, საიდანაც სახლში ნასვამ მდგომარეობაში ბრუნდებოდა. სახლისკენ მიმავალ გზაზე სამხედრო მოსამსახურე ჩავარდა მდინარის პირას წყლის არხში და შედეგად მიიღო დაზიანება", — ნათქვამია სამინისტროს განცხადებაში.

სამხედროს მდგომარეობა ამ ეტაპისთვის სტაბილურია. შინაგან საქმეთა სამინისტრომ გამოძიება სისხლის სამართლის კოდექსის 126-ე, ძალადობის მუხლით დაიწყო.