სამართლიანი არჩევნების ინფორმაციით, ოპოზიციის წინააღმდეგ მართული ორგანიზებული კამპანიის სამი ფეისბუქგვერდის უკან ია მეტრეველის მიერ დაარსებული ორგანიზაცია დავასრულოთ დგას.

ISFED-ის ცნობით, 7 აგვისტოს, ანუ იმავე დღეს, როდესაც საქართველოში ფეისბუქრეკლამების ბიბლიოთეკა სრული სახით ამოქმედდა, საჯარო რეესტრის ეროვნულ სააგენტოში არაკომერციული იურიდიული პირი დავასრულოთ დარეგისტრირდა.

ორგანიზაციის ინფორმაციით, 12 აგვისტოს გამართულ პრეზენტააციაზე დამფუძნებლებმა განაცხადეს, რომ მათი მთავარი მიზანი ერთიანი ნაციონალური მოძრაობის "დასრულებაა".

22 სექტემბრიდან ზემოთთქმული 3 ფეისბუქგვერდის (არქივი, პოლიტიკური მოთვალთვალე და დავასრულოთ) დასპონსორებული პოსტების შესაბამისი დეკლარირების ველში თანხის გადამხდელად სწორედ ორგანიზაცია დავასრულოთ მიეთითა, ხოლო საკონტაქტო ნომრად ამავე ორგანიზაციის მისამართი და სატელეფონო ნომერი განთავსდა.

ფოტო: ISFED

ISFED-ის ცნობით, მიმდინარე წლის 17 სექტემბერს ორგანიზაციამ დავასრულოთ ვებსაიტის დომენი დაარეგისტრირა (davasrulot.ge), 18 სექტემბერს კი ფეისბუქზე გვერდი დავასრულოთ ამოქმედდა. ამ დროისთვის ვებსაიტზე მასალა განთავსებული არაა, ხოლო ფეისბუქგვერდზე მხოლოდ ერთი პოსტია განთავსებული, რომლის მიზანიც ერთიანი ნაციონალური მოძრაობის პარტიული სიის პირველი ნომრის, ბუბა კიკაბიძის დისკრედიტაციაა.

ფოტო: ISFED