ევროპის კავშირის უმაღლესმა სასამართლომ დაადგინა, რომ უნგრეთის მიერ უმაღლესი განათლების კანონში დაწესებული ცვლილებები, რომლითაც ამერიკელი მილიარდერისა და ფილანთროპის ჯორჯ სოროსის უნივერსიტეტი დახურეს, ევროკავშირის კანონთან თანხვედრაში არ არის. საუბარია ცენტრალური ევროპის უნივერსიტეტზე (CEU), რომელმაც თავისი საქმიანობის ძირითადი ნაწილი ვენაში 2018 წელს გადაიტანა.

2017 წელს უნგრეთში მიიღეს კანონი, რომლიც მიხედვით, უცხოეთში რეგისტრირებულ უნივერსიტეტებს უნგრეთში ფუნქციონირების უფლება არ ჰქონდათ, თუ ისინი ამავდროულად სასწავლო კურსებს საკუთარ ქვეყნებში არ ატარებდნენ, რაც, როგორც AP წერს, ევროსასამართლომ 6 ოქტომბრის გადაწყვეტილებაში კანონმდებლობასთან შეუსაბამოდ ცნო.

"უნგრეთის პრემიერმინისტრ ვიქტორ ორბანის მთავრობის მიერ შემოღებული პირობები, რომლებიც უცხოურ უმაღლეს სასწავლებლებს საკუთარი საქმიანობის განხორციელების საშუალებას მის ტერიტორიაზე არ აძლევს, ევროკავშირის კანონმდებლობასთან შეუსაბამოა", — განაცხადეს ევროსასამართლოში.

ორბანი სოროსის მწვავე კრიტიკოსი წლების განმავლობაში იყო, რომელიც ამტკიცებდა, რომ მილიარდერი ქველმოქმედი თავისი ლიბერალური შეხედულებებით მიგრაციაზე ევროპული ღირებულებების შერყევას აპირებს.