სომხეთის განათლების მინისტრმა, არაიკ არუთინიანმა საკუთარ ფეისბუქგვერდზე დაწერა, საქართველოს მესამე პრეზიდენტს, მიხეილ სააკაშვილს ერევნის უნივერსიტეტის საპატიო დოქტორის წოდება ჩამოართვეს.

"ახლახანს ერევნის სახელმწიფო უნივერსიტეტის აკადემიურმა საბჭომ მიიღო გადაწყვეტილება, რომ საქართველოს ყოფილ პრეზიდენტს, მიხეილ სააკაშვილს ჩამოერთვას ერევნის უნივერსიტეტის საპატიო დოქტორის წოდება", — წერს არუთინიანი.

არაიკ არუთინიანმა ჯერ კიდევ გუშინ, 30 ოქტომბერს დაწერა საკუთარ ფეისბუქგვერდზე, რომ აპირებდა მიემართა ერევნის უნივერსიტეტის აკადემიური საბჭოსთვის, რათა მიხეილ სააკშვილისთვის საპატიო დოქტორის წოდება ჩამოერთვათ. მიზეზად სომხეთის განათლების მინისტრი ექსპრეზიდენტის მხრიდან აზერბაიჯანის წახალისებისა და არაპირდაპირ მხარდაჭერას ასახელებს. არუთინიანის თქმით, ეს სომეხი ხალხის იდენტობის, ცხოვრებისა და სიცოცხლის უფლების წინააღმდეგაა მიმართული.