დიდმა ბრიტანეთმა და კანადამ ბელარუსის პრეზიდენტ ალექსანდრ ლუკაშენკოს, მის შვილსა და რამდენიმე ბელარუს მაღალჩინოსანს სანქციები დაუწესეს. სანქციების გატარება საპრეზიდენტო არჩევნების ფალსიფიკაციასა და დემონსტrანტებზე ძალადობას უკავშირდება.

ეს არის პირველი სანქცია, რომელიც დასავლეთის ქვეყნებმა ბელარუსი მაღალჩინოსნების წინააღმდეგ გაატარეს. ის მათთვის ქვეყანაში შესვლის აკრძალვასა და მათი აქტივების გაყინვას ითვალისწინებს.

"ლუკაშენკოს მოძალადე და თაღლითური რეჟიმისთვის სანქციების დაწესებით დიდმა ბრიტანეთმა და კანადამ მკაფიო სიგნალი გაგზავნეს", — ნათქვამია დიდი ბრიტანეთის საგარეო საქმეთა მინისტრის, დომინიკი რააბას განცხადებაში.

კანადის ფედერალური მინისტრი საგარეო საქმეთა საკითხებში, ფრანსუა-ფილიპ შამპანი ამბობს, რომ ბელარუსი აგრძელებს ადამიანის უფლებების სისტემატურ დარღვევას და ოპოზიციურ ჯგუფებთან მოლაპარაკებებისთვის გზებს არ ეძებს.

ლუკაშენკოსა და მისი შვილის ვიქტორის გარდა, რომელიც პრეზიდენტის ადმინისტრაციის ხელმძღვანელია, ბრიტანეთმა სანქციები დაუწესა შინაგან საქმეთა მინისტრსა და მის ორ მოადგილეს. კანადის სანქციები კი ლუკაშენკოს გარდა კიდევ ათ მაღალჩინოსანს შეეხო.