ელიავას ბაზრობაზე ხანძარი ლიკვიდირებულია, ხანძრის შედეგად არავინ დაშავებულა. ინფორმაციას ამის შესახებ საგანგებო სიტუაციების მართვის სამსახური ავრცელებს. მათივე თქმით, ამ ეტაპზე მხოლოდ უმნიშვნელო კერების ჩაქრობა მიმდინარეობს.

ბაზრობაზე ცეცხლი დაახლოებით 800 კვადრატზე იყო გავრცელებული და მის სალიკვიდაციო სამუშაოებში 16 სახანძრო ბრიგადა იყო ჩართული.

"ცეცხლი გავრცელდა ხის მასალების სასაწყობე ფართზე და რამოდენიმე მაღაზიაზე. მეხანძრე-მაშველების დროული რეაგირების შედეგად მოხერხდა ხანძრის ლოკალიზება", — აცხადებენ უწყებაში.

მათივე ინფორმაციით, 112-ში ხანძრის შესახებ ინფორმაცია 02:48 საათზე შევიდა და მეხანძრე-მაშველები რამდენიმე წუთში უკვე ადგილზე იმყოფებოდნენ.

ჯერჯერობით, უცნობია რა გახდა მორიგი ხანძრის მიზეზი ელიავას ბაზრობაზე. ასევე, უცნობია რამდენია ზარალი და დაეხმარება თუ არა სახელმწიფო ხანძრის შედეგად დაზარალებულებს.