ნაციონალური მოძრაობის წევრის, გიორგი ბარამიძის თქმით, ისინი გირჩის ლიდერს, ზურაბ ჯაფარიძეს კონკურენტს არ დაუყენებენ, რადგან მათ აქვთ მიზანი — დაამარცხონ ქართული ოცნების ლიდერი, გია ვოლსკი, რომელიც იმავე ოლქშია კანდიდატი.

"არ აქვს ჩვენთვის მნიშვნელობა, ზურაბ ჯაფარიძე იქნება, თუ ვინც არ უნდა იყოს, რომ ოპოზიციონერმა და ვინმემ ვოლსკისთან წააგოს. არ გვინდა, რომ ამ ოპოზიციონერმა ისე გაიხადოს თავი, რომ ძირითადმა ნაწილმა ოპოზიციური ამომრჩევლებისა, რომლებიც ენმ-ს ამორმჩევლები არიან, არ მისცენ მას ხმა. რაც გამოიწვევს იმას, რომ ის დამარცხდება და ვოლსკი გაიმარჯვებს და ეს არ გვინდა", — განაცხადა მან ფორმულას ეთერში.

მან ურჩია ჯაფარიძეს, რომ "ზედმეტ ეჭვიანობას თავი დაანებოს". ბარამიძემ განმარტა, რომ სააკაშვილს "პოლიტიკანები" და "პარტიუკები" კონკრეტულად არავისთვის უწოდებია და ჯაფარიძემ თავის თავზე არ უნდა იფიქროს.

"ჩვენ რომ პარტიუკად და პოლიტიკანად მიგვაჩნდეს ზურაბ ჯაფარიძე, მაშინ ჯერ მოვხსნიდით მისდამი ჩვენს მხარდაჭერას და მერე ვილაპარაკებდით ასე", — განაცხადა ბარამიძემ.

კითხვაზე, ვინ იგულისხმა მაშინ საკააშვილმა, ბარამიძე პასუხობს, რომ იმათზე, ვინც მართლა "პარტიუკაა".

"60 პარტიაა, ვინც არის... კი შემიძლია ვთქვა [რომ არ მიემართებოდა ლეიბორისტული პარტიის ოფისში შეკრებილ პარტიებს]" — განაცხადა მან.

ერთიანი ნაციონალური მოძრაობა ზურაბ ჯაფარიძეს ბოდიშის მოხდისკენ მოუწოდებს. პარტიაში მიაჩნიათ, რომ ჯაფარიძის განცხადება, თითქოს ენმ-ის ამომრჩევლის ხმები მისთვის საინტერესო არ არის, შეცდომაა და უნდა განმარტოს, რა იგულისხმა. ჯაფარიძე კი ფიქრობს, რომ საბოდიშო არაფერი აქვს.

გაიგეთ მეტი: