სამყაროში, სადაც ყველაფერი უკვე თავდაყირაა, კარგია იმის ცოდნა, რომ რაღაც მაინც არ იცვლება. მაგალითად, ის, რომ ბენქსი ისევ დასცინის საკუთარ აუდიტორიას, რომელსაც ის ძალიან უყვარს.

აუქციონზე, რომელსაც ერქვა "ბენქსი: არ მჯერა, რომ ამ ნაგავს მართლა ყიდულობთ, იდიოტებო" (აუქციონს ასეთი სახელი პირველად არ აქვს), არტისტის 2004 წლის საკულტო ნამუშევარი ბუშტიანი გოგონა (იისფერი) (Balloon Girl – Colour AP Purple) £791 250-ად გაიყიდა, რაც დაახლოებით $1 მილიონია. ამით ბენქსის პრინტის აუქციონზე გაყიდვის მსოფლიო რეკორდიც მოიხსნა და ზოგადად ონლაინ-აუქციონზე პრინტის გაყიდვის მსოფლიო რეკორდიც.

ფოტო: Christie's

ბენქსის ნამუშევრები, როგორც წესი, აუქციონებზე საკმაოდ მაღალ თანხებზე ადის, თუმცა მისი ბუშტიანი გოგონას გამოსახულებამ საზოგადოების განსაკუთრებული ყურადღება მიიპყრო. ეს იმასთანაა დაკავშირებული, რომ 2018 წელს, მას შემდეგ რაც ბენქსის გოგონა ბუშტით (Balloon Girl) ლონდონში სოტბის აუქციონზე $1.37 მილიონად გაიყიდა, ხელოვნების ნიმუშმა აუდიტორიის თვალწინ საკუთარი თავი დაიქუცმაცა, რამაც მნახველები გააოცა. ბევრს ეს ოინი სულელური ეჩვენა, თუმცა სხვებისთვის ის გენიალური იყო; ნებისმიერ შემთხვევაში, ეს მოგონება საზოგადოების ცნობიერებაში დარჩა:

მომავალ თვეში სოტბის აუქციონზე ბენქსის კიდევ ერთი ნამუშევარი გავა აუქციონზე, რასაც შეიძლება მსგავსი ფასები მოყვეს. ეს იქნება 2005 წლის მაჩვენე მონე (Show me the Monet), რომელიც კლოდ მონეს 1899 წლის ცნობილი დუმფარების იმიტაციაა, რომელზეც საგზაო კონუსები და სავაჭრო კალათებია მიმობნეული. Forbes-ის ცნობით, ინგლისელი მომღერალი და ბენქსის დიდი ფანი რობი უილიამსი მზადაა, მაჩვენე მონესთვის $13 მილიონამდე გადაიხადოს, რაც ერთგულების ისეთი დონეა, როგორსაც, ალბათ, თვითონ არტისტიც კი არ ელოდა.

ფოტო: Getty Images

ამავე თემაზე: