საერთაშორისო აეროპორტების ოპერატორი კომპანია TAV Georgia-ს გენერალური დირექტორის მოადგილის, თეა ზაქარაძის განცხადებით, კორონავირუსის პანდემიის გამო, თბილისის საერთაშორისო აეროპორტში მგზავრთა ნაკადმა 95-97%-ით იკლო. ზაქარაძის თქმით, 2005 წლის აგვისტოს მონაცემებით, წლიურ მგზავრთა რაოდენობა 545 000 იყო, მიმდინარე წლის აგვისტოში კი 60 000-მდე მგზავრს მოემსახურნენ.

"თბილისის საერთაშორისო აეროპორტში 2019 წელს 100-დან 125 რეისამდე გვქონდა. დღესდღეობით, თბილისის საერთაშორისო აეროპორტში მაქსიმუმი ჩარტერი არის 8 ან 10. ოღონდ, რა თქმა უნდა, მგზავრთა რაოდენობა შემომყვან მგზავრზე შეზღუდულია. ძალიან ბევრი ავიაკომპანია ჩარტერს ასრულებს მხოლოდ გამყვან მგზავრზე და არა შემომყვანზე. ივნისის თვეში სულ მოვემსახურეთ 2 300 მგზავრს, აგვისტოში — 18 000-ს", — განაცხადა თეა ზაქარაძემ BMG-სთან საუბრისას.

TAV Georgia თბილისისა და ბათუმის საერთაშორისო აეროპორტებს მართავს.

კორონავირუსის პანდემიის გამო, რეგულარული ფრენები მარტის ბოლოდან შეწყდა. ავიაციის სააგენტოში აცხადებენ, რომ ფრენების აღდგენის საკითხი ეპიდემიოლოგიურ მდგომარეობაზეა დამოკიდებული. ბოლო ინფორმაციით, საქართველოში რეგულარული ფრენების აღდგენის თარიღი 30 სექტემბრამდე გადაიდო.