საქართველოში რეგულარული ფრენების აღდგენის თარიღი 30 სექტემბრამდე გადაიდო. საქართველოს ავიაციის სააგენტოს ინფორმაციით, შეზღუდვა მხოლოდ სამ ქვეყანასთან კონკრეტული ავიაკომპანიის ფრენებზე არ ვრცელდება. ეს ქვეყნებია: გერმანია, საფრანგეთი და ლატვია.

"გამომდინარე იქედან, რომ COVID-19 პანდემიის პირობებში ავიაციის სექტორისთვის ვითარება რთულად პროგნოზირებადია და გლობალურ დონეზე, პერიოდულად იცვლება გადაწყვეტილებები სასაზღვრო და სამგზავრო შეზღუდვებთან დაკავშირებით, მოქალაქეებს და მგზავრებს კვლავ მოვუწოდებთ, თავი შეიკავონ დაუდასტურებელ მიმართულებებზე/რეისებზე ბილეთების შეძენისაგან", — აცხადებენ საქართველოს ავიაციის სააგენტოში.

უწყებაში მგზავრებს ბილეთების შეძენისგან თავის შეკავებისკენ მოუწოდებენ.

რაც შეეხება სხვა ქვეყნებთან ფრენების აღდგენის საკითხს, ავიაციის სააგენტოში ამბობენ, რომ ეს ეპიდემიოლოგიურ მდგომარეობაზე იქნება დამოკიდებული.

კორონავირუსის პანდემიის გამო, რეგულარული ფრენები მარტის ბოლოდან შეწყდა. ამ დროისათვის საქართველოდან რეგულარული ფრენები გერმანიასთან, საფრანგეთთან და ლატვიასთან სრულდება. სხვა ქვეყნებთან სრულდება მხოლოდ ჩარტერული რეისები, რომლებსაც ქვეყნებიდან საქართველოს მოქალაქეები ჩამოჰყავს.