TBC PAY ქართული ფინტექ-ინდუსტრიის ერთ-ერთი ყველაზე ინოვაციური და გამორჩეული წარმომადგენელია. თავდაპირველად, კომპანიის მიზანი ბანკის გადასახადებისგან განტვირთვასთან იყო დაკავშირებული.

დღეისათვის კი კომპანია მაქსიმალურად ცდილობს, რომ მომხმარებელსა და ბიზნესს გაუმარტივოს სერვისების გადახდების პროცესი. სხვადასხვა ლოკაციაზე განთავსებული თიბისი ფეის 3600-მდე სწრაფი ჩარიცხვის აპარატის გარდა, მომხმარებელს დისტანციური გადახდის საშუალებებსა და მობილურ აპლიკაციას სთავაზობს.

არ არის გასაკვირი, რომ კომპანიის ზრდისა და განვითარების პარალელურად საგრძნობლად იმატა რუტინული და განმეორებადი დავალებების რაოდენობამ, რაც უზარმაზარ ადამიანურ რესურსს მოითხოვდა. ამასთან, დავალებები საერთოდ არ საჭიროებდა კრეატიულ ან/და განსხვავებულ მიდგომებს - ისინი იყო ერთფეროვანი და განმეორებადი.

სწორედ ამ მიზეზით თიბისი ფეიმ მიიღო გადაწყვეტილება პროცესების რობოტიზაციის ტექნოლოგიის დანერგვის შესახებ.

TBC PAY გახდა თიბისი ჯგუფის პირველი კომპანია, რომელმაც RPA ტექნოლოგია (Robotic Process Automation), იგივე პროცესების რობოტიზაცია დანერგა. სისტემის დახმარებით, უკვე შესაძლებელია უამრავი სტანდარტიზირებული პროცესის ავტომატიზება, რაც საგრძნობლად ამარტივებს და აჩქარებს სამუშაო პროცესს.

რობოტიზაციის დანერგვით ყოველდღიური რუტინული საქმიანობა სრულად გადადის რობოტების ხელში და შესაბამისად თავისუფლდება მეტი დრო, რომელიც თვითგანვითარებასა და გაცილებით საინტერესო საკითხებთან გამკლავებაში შეიძლება დაიხარჯოს.

პროგრამული რობოტი ერთგვარი ციფრული თანამშრომელია, რომელიც მუშაობს 24/7-ზე, არ უშვებს შეცდომას და ყოველგვარ სამუშაოს უმოკლეს დროში ასრულებს. ეს კი, თავის მხრივ, ინფორმაციის და შესრულებული სამუშაოს 100% ვალიდურობას უზრუნველყოფს.

ამასთან, არსებობს 2 განსხვავებული ტიპის პროგრამული რობოტი - პირველი სრულად დამოუკიდებლად მუშაობს, ხოლო მეორე ერთგვარი ასისტენტია, რომელიც მზად არის გადაიბაროს ნებისმიერი დავალება მუშაობის პარალელურად.

NGT ჯგუფისა და თიბისი ფეის გუნდის ერთობლივი ძალისხმევით, მოხდა არსებული პროცესების გაანალიზება და შემუშავდა რობოტიზაციის სამუშაო გეგმა, რომელიც მოიცავს ავტომატიზებადი პროცესების იდენტიფიკაციასა და სწორი რობოტის შერჩევას. კომპანიის უმთავრესი პრიორიტეტი იყო ისეთი სისტემის შერჩევა, რომლის გამოყენებასაც შეძლებს ნებისმიერი ბიზნეს მომხმარებელი - ყოველგვარი პროგრამირების ცოდნის გარეშე. ასეთივე მნიშვნელობა ენიჭება პლატფორმის სანდოობას, უსაფრთხოებასა და მოქნილობას.

აღსანიშნავია, რომ TBC PAY-ს რობოტიზაციის პროცესი კვლავინდებურად აქტიურად მიმდინარეობს. გარკვეული პროცესების ავტომატიზაცია უკვე დასრულებულია, ხოლო ნაწილი დაგეგმარების და ზოგიერთი მათგანი უკვე დანერგვის ეტაპზეა.

რობოტიზაციის დახმარებით თიბისი ფეიმ სრულად გააუმჯობესა ინფორმაციის გამტარუნარიანობა, დააჩქარა შიდა პროცესები, გააუმჯობესა ყოველდღიური სერვის რეპორტების გენერირება, პრობლემების ავტომატური იდენტიფიკაცია, სისტემური მონიტორინგი და სხვა.

---

პროცესების რობოტიზაციის შესახებ დამატებითი ინფორმაციის მისაღებად, დარეგისტრირდით NGT ჯგუფის ვებინარზე, რომელიც გაიმართება 30 სექტემბერს - რეგისტრაცია