შმაგი მუთოშვილს ბრალი წარედგინა. ინფორმაცია ამის შესახებ On.ge-ს პროკურატურაში დაუდასტურეს.

უწყების ცნობით, მუთოშვილს ბრალი წარდგენილი აქვს ცეცხლსასროლი იარაღის მართლსაწინააღმდეგო შეძენის, შენახვისა და ტარებისთვის. ასევე, ორი პირის განზრახ მკვლელობის მცდელობისთვის. საქართველოს სისხლის სამართლის კოდექსის 236-ე მუხლის მე-3 და მე-4 ნაწილებითა და 109-ე მუხლის მე-3 ნაწილის "ა" ქვეპუნქტით.

საქმე ეხება 29 ივლისს, ღამით, სოფელ დუისში მურად ქავთარაშვილის სახლის დაცხრილვას. სახლში, რომელსაც რამდენიმე ტყვია მოხვდა, მურად ქავთარაშვილი და მისი მშობლები იმყოფებოდნენ. სროლის შედეგად არავინ დაშავებულა.

შმაგი მუთოშვილის ძმა, ვისო მუთოშვილი 2019 წელს სოფელ საკობიანოსთან მომხდარი დაპირისპირების დროს მოკლეს. ერთმანეთს ორი გვარი ქავთარაშვილები და მუთოშვილები დაუპირისპირდნენ. ვისო მუთოშვილის მკვლელობაში ბრალდებულ ორ პირს — არბი ქავთარაშვილსა და რამაზ ხანგოშვილს 11 და 9 წლით თავისუფლების აღკვეთა მიესაჯა.