Wizzair-ის რეგულარული ფრენები უსაფრთხო მიმართულებით, სექტემბერში ქუთაისის საერთაშორისო აეროპორტში აღდგება. ამის შესახებ ეკონომიკისა და მდგრადი განვითარების მინისტრმა, ნათია თურნავამ განაცხადა.

"მკაცრი აკრძალვების მაგივრად, ვაპირებთ, ვიცხოვროთ პანდემიასთან ერთად. ეკონომიკა პანდემიის პარალელურად იმუშავებს, რაც საზღვრების მეტ გახსნილობას ნიშნავს. ეტაპობრივად ვხსნით ფრენებს, მაგალითად, სექტემბერში 90-მდე ფრენა არის დაგეგმილი.

პირდაპირ გეტყვით რომ უკვე ამ თვეში აღდგება გარკვეული უსაფრთხო მიმართულებით ფრენები Wizzair-ის მიერ ქუთაისის საერთაშორისო აეროპორტში. ასევე, აქტიური მოლაპარაკება მიმდინარეობს Ryanair-თან", — განაცხადა თურნავამ.

საერთაშორისო რეგულარულ საჰაერო მიმოსვლიაზე დაწესებული შეზღუდვები პირველ ნოემბრამდე გახანგრძლივდა. სამოქალაქო ავიაციის სააგენტოს ვებგვერდზე განთავსებული ინფორმაციით მიხედვით, შეზღუდვები 2020 წლის 31 ოქტომბრის ჩათვლით მოქმედებს.

ამ დროისათვის საქართველოდან რეგულარული ფრენები გერმანიასთან, საფრანგეთთან და ლატვიასთან სრულდება. სხვა ქვეყნებთან სრულდება მხოლოდ ჩარტერული რეისები, რომლებსაც ქვეყნებიდან საქართველოს მოქალაქეები ჩამოჰყავს.