2019 წელს იმერეთის მუნიციპალურ იურიდიულ პირთა ხარჯები 10 მილიონი ლარით გაიზარდა. ამის შესახებ საერთაშორისო გამჭვირვალობა — საქართველო ახალ კვლევას აქვეყნებს.

TI-ის ინფორმაციით, 2017 წლის ადგილობრივი თვითმმართველობის არჩევნების შემდეგ, 2019 წლისთვის იმერეთის მუნიციპალიტეტების იურიდიულ პირებში გაიზარდა როგორც დასაქმებულთა, ასევე მათი საქმიანობისთვის გამოყოფილი საბიუჯეტო დაფინანსებაც და ჯამში 37 180 329 ლარი შეადგინა. მათი ცნობით, გამოკვლეული ინფორმაცია იმერეთის 10 მუნიციპალიტეტს ეხება.

ორგანიზაციაში აცხადებენ, რომ იურიდიული პირების რაოდენობა შემცირდა, თუმცა, 2017 წელთან შედარებით, 2019 წელს დასაქმებულთა რაოდენობა 1 470-ით გაიზარდა. მათი ცნობით, ჯამურად ყველაზე მეტი — 1 498 დასაქმებული ჭიათურის მუნიციპალიტეტს ჰყავს, კერძოდ "გაერთიანებულ საბავშვო ბაღს".

რაც შეეხება იურიდულ პირთა რაოდენობას, ყველაზე მეტი, 24 სამტრედიის მუნიციპალიტეტს აქვს გაფორმებული. TI-ის ინფორმაციით, 2019 წელს ხარაგაულის მუნიციპალიტეტში რამდენიმე იურიდიული პირის გაერთიანებამ იურიდიული პირების რაოდენობის მკვეთრი შემცირება გამოიწვია.

ორგანიზაციის კვლევის თანახმად, იმერეთის ათ მუნიციპალიტეტში 2019 წელს იურიდიულ პირებში დასაქმებულთა შრომით ანაზღაურებაზე 8 701 060 ლარით მეტი დაიხარჯა და მან 32 923 150 ლარი შეადგინა. რაც შეეხება იურიდიულ პირებში დასაქმებულებზე გაცემულ პრემია/დანამატებს, იგი ბოლო სამი წლის განმავლობაში 478 163 ლარით გაიზარდა.

საერთაშრისო გამჭვირვალობა — საქართველოს ინფორმაციით, როგორც ყველაზე მეტი სახელფასო თანხის, ასევე გაცემული პრემია/დანამატების ოდენობით, ჭიათურის მუნიციპალიტეტი ლიდერობს. მუნიციპალიტეტის ინფორმაციით, პრემია სააღდგომო და საახალწლო დღესასწაულებთან დაკავშირებით გაიცა, ხოლო დანამატი — ზეგანაკვეთური სამუშაოსთვის.

რაც შეეხება, ავტოსატრანსპორტო საშუალებების ხარჯებს — აქ თერჯოლის და წყალტუბოს მერიების იურიდიული პირები ლიდერობენ. მათგან, თერჯოლის მერიის იურიდიული პირებიდან ყველაზე მეტი — 534 648 ლარი აქვს ა(ა)იპ თერჯოლის დასუფთავებისა და კეთილმოწყობის მუნიციპალურ ცენტრს. წყალტუბოს მერიის იურიდიული პირებიდან ყველაზე მეტი საავტომობილო ხარჯი წყალტუბოს მუნიციპალიტეტის დასუფთავებას და წყალტუბოს მუნიციპალიტეტის კეთილმოწყობის ცენტრს ჰქონდა. 2019 წელისთვის ეს იურიდიული პირები გაერთიანდნენ და საავტომობილო ხარჯმა 475 895 ლარი შეადგინა.

TI-ის ინფორმაციით, ყველაზე მეტი ხარჯი ტელეკომუნიკაციაზე ხარაგაულის და წყალტუბოს მუნიციპალიტეტებში გასწიეს. მათგან ხარაგაულის მერიის ა(ა)იპ ე.კიკნაძის სახელობის სკოლამდელ დაწესებულებათა გაერთიანებამ — 12 061 ლარი, ხოლო ა(ა)იპ კულტურის და ხელოვნების ცენტრმა 9 032 ლარი დახარჯა ინტერნეტ და სატელეფონი კომუნიკაციებზე.

ასევე, გასულ წელს წყალტუბოს მუნიციპალიტეტის იურიდიული პირებიდან ა(ა)იპ წყალტუბოს მუნიციპალიტეტის საბავშვო ბაღების გაერთიანებამ ყველაზე მეტი, 9 072 ლარი დახარჯა ტელეკომუნიკაციაზე.

TI მიიჩნევს, რომ მაშინ, როცა ადგილობრივი თვითმმართველობები ინფრასტრუქტურული და სოციალური პრობლემების მოსაგვარებლად შესაბამისი ფინანსური სახსრების ნაკლებობას განიცდიან, ხარჯების მსგავსი მასშტაბური მატება მიზანშეუწონელია.

საერთაშორისო გამჭვირვალობა — საქართველოს მოსაზრებით, მუნიციპალიტეტებმა უახლოეს პერიოდში უნდა გადადგან შემდეგი ნაბიჯები:

• შეისწავლონ საქმიანობის ის მიმართულებები, რომელთა ჯეროვნად შესასრულებლად შპს-ის ან ა(ა)იპ-ის არსებობა გადაუდებელი აუცილებლობაა. ასეთი აუცილებლობის არარსებობის შემთხვევაში კი მიიღონ გარკვეული მომსახურებები ტენდერის გზით — ეს შეამცირებს როგორც ადმინისტრაციულ დანახარჯებს, ასევე დაზოგავს საბიუჯეტო სახსრებს;
• გადახედონ არსებულ პრაქტიკას და იხელმძღვანელონ საზოგადოებრივი ინტერესების გათვალისწინებით, რათა ეფექტიანი მენეჯმენტისა და გონივრული საკადრო პოლიტიკის პირობებში, მაქსიმალურად გააუმჯობესონ მუნიციპალური სერვისების ხელმისაწვდომობა და ხარისხი.