ულტრანაციონალისტური, ძალადობრივი, ჰომოფობიური და ქსენოფობიური პოლიტიკური პარტიიის, ქართული მარშის ლიდერმა, სანდრო ბრეგაძემ გლდანში თავისი კანდიდატურა მოხსნა. ამის შესახებ ბრეგაძე სოციალურ ქსელში წერს.

ბრეგაძე მიზეზად იმას ასახელებს, რომ პრორუსულმა პარტიამ, პატრიოტთა ალიანსმა მას კონკურენტი დაუყენა. მისი თქმით, გულუბრყვილოდ ჰქონდა ილუზია, რომ "ყველა ეროვნული ძალა გვერდით დაუდგებოდა".

"ეტყობა მოხდა დისკომუნიკაცია და ჩემმა მეგობრებმა პატრიოტთა ალიანსიდან დააყენეს თავიანთი კანდიდატურა ჩემს წინააღმდეგ!!! სიმართლეს ვიტყვი — ამას არ ველოდი!!! ამიტომ კიდევ მე დავიმდაბლებ თავს და ვხსნი ჩემს კანდიდატურას გლდანის საარჩევნო ოლქში", — წერს ბრეგაძე და იქვე ამატებს: "ჭირსაც წაუღია პარლამენტარის მანდატი".

პატრიოტთა ალიანსმა გლდანში მაჟორიტარობის კანდიდატად მერაბ ჭიქაშვილი წარადგინა.

შეგახსენებთ, რომ ძალადობრივი მოწოდებებით გამორჩეული ჯგუფი პოლიტიკურ პარტიად გადაკეთდა. გარდა პოლიტიკური პარტიის დაფუძნებისა, ბრეგაძე კონსულტაციებს მართავდა, რომ მათი იდეოლოგიის მქონე ძალებისგან პოლიტიკური ცენტრი შეექმნა.

პრორუსული დაჯგუფების პირველი ყრილობა ილია ჭავჭავაძის მუზეუმში გაიმართა. დაჯგუფება, რომელიც მუდმივად ქსენოფობიურ და ანტიდასავლურ გზავნილებს ავრცელებს, ამტკიცებდა, რომ ქართული ლიბერალიზმის ერთ-ერთი ფუძემდებლისა და პროდასავლური იდეების მქონე ილია ჭავჭავაძის პრინციპების გამგრძელებლები არიან.