საქართველოს სახალხო დამცველი ბათუმის ხანდაზმულთა პანსიონატში კორონავირუსის შემთხვევების დადასტურებას შემაშფოთებელს უწოდებს. სახალხო დამცველის აპარატში აცხადებენ, რომ ხანდაზმულთა პანსიონატში Covid-19-ის დადასტურება ამ და სხვა დაწესებულებებში პრევენციის, კონტროლისა და მონიტორინგის ღონისძიებების გაძლიერების აუცილებლობას კიდევ ერთხელ მიუთითებს.

"სახალხო დამცველის მონიტორინგი აჩვენებს, რომ მეტი ძალისხმევა უნდა იყოს მიმართული დაწესებულებებში პირთა მიმოსვლის, დამცავი საშუალებების გამოყენებისა და არსებული წესების კონტროლის მიმართულებით", — აცხადებენ ომბუდსმენის აპარატში.

სახალხო დამცველი შესაბამის უწყებებს სახელმწიფო ზრუნვის დაწესებულებებში მყოფი პირების ჯანმრთელობის უფლების დაცვაზე განსაკუთრებული ყურადღების გამახვილებისკენ მოუწოდებენ.

მათივე განცხადებით, მსოფლიო ტენდენცია აჩვენებს, რომ ახალი კორონავირუსისადმი მაღალი მოწყვლადობა ხანდაზმულ, ქრონიკული დაავადებების მქონე და შეზღუდული შესაძლებლობის მქონე პირებს გააჩნიათ. ამიტომ, საყურადღებოა სახელმწიფო ზრუნვის, თავისუფლების შეზღუდვისა და აღკვეთის დაწესებულებებში მყოფ პირთა მდგომარეობა, რადგან, მათივე თქმით, გარემო პირობების გამო, ვირუსის გავრცელების რისკები ამ დაწესებულებებში მაღალია.

აჭარაში ხანდაზმულთა პანსიონატის 5 ბენეფიციარსა და ერთ თანამშრომელს Covid-19, გუშინ 14 სექტემბერს, დაუდასტურდა.

თავშესაფარში სულ 120 მობინადრე და 70 თანამშრომელია.