საქართველოს ფარიკაობის ფედერაცია კერძო დამფინანსებელს ეძებს. ოლიმპიადაში, რომელიც 2021 წლის ივლისში ტოკიოში გაიმართება, საქართველოს სახელით ევროპის სამგზის ჩემპიონი და მსოფლიო თასების მფლობელი, მოფარიკავე სანდრო ბაზაძე იასპარეზებს.

როგორც On.ge-სთან საუბარში სანდრო ბაზაძემ აღნიშნა, იგი წვრთნებს საფრანგეთში გადიოდა და პანდემიის დროს შექმნილი ვითარების გამო დაბრუნება მოუწია. საქართველოს ფარიკაობის ფედერაციის მარკეტინგის მენეჯერის, ნიკოლოზ ბაძაღუას თქმით კი, ბიუჯეტიდან წვრთნებისა და სხვა ხარჯებისთვის თანხა წინასწარ იყო ჩარიცხული და დაბრუნება ვერ მოხერხდა. რადგან ოლიმპიადა 2021 წლისთვის გადაიდო, სპორტსმენისთვის მომზადება კვლავ საჭიროა.

"ჩვენ არ ვითხოვთ, ფული გვაჩუქონ და ჩვენ არაფერს გავაკეთებთ. სანდრო ბაზაძეს 12 ტურნირი აქვს წლის მანძილზე სხვადასხვა ქვეყანაში, რაც ნიშნავს ამდენივე შეხვედრას დელეგაციებთან, საელჩოსთან, ბიზნესსექტორთან, სადაც აცვია ეროვნული ნაკრების ფორმა. შეუძლია, დამფინანსებლის ბრენდირებული სამოსი ეცვას", — აღნიშნა ბაძაღუამ.

როგორც ბაძაღუამ განაცხადა, ოლიმპიადაზე ღირსეული კონკურენციისთვის მეტი ფინანსური რესურსია საჭირო. მისივე თქმით, ამ დროისთვის ფარიკაობის ფედერაციას 43 კერძო კომპანიასთან აქვს მონაცემები გაგზავნილი, სადაც ახსნილია, რა რესურსი და წარმატება აქვთ თავად და რის შეთავაზება შეუძლიათ კომპანიებისთვის. ნიკოლოზ ბაძაღუამ აღნიშნა, რომ ფარიკაობის მიმართულებით მიღწევები არის, მაგრამ ამის გაცნობა და ფართო საზოგადოების დაინტერესება პრობლემად რჩება.