ცნობილი სერიალი The Walking Dead თითქმის ათი წლის წინ იხილა პირველად მაყურებელმა და როგორც ცოტა ხნის წინ გაირკვა, მალე ამ შოუსთან გამომშვიდობება მოგვიწევს.

Variety-ის ცნობით, სერიალის შემოქმედებმა გადაწყვიტეს, რომ საშინელებათა ჟანრის ეს პოსტაპოკალიფსური ისტორია საბოლოოდ მეთერთმეტე სეზონით დასრულდეს. ამ სეზონის გადაღებები წელსვე უნდა დაწყებულიყო, მაგრამ პანდემიამ ამ მიზნის განხორციელებასაც შეუშალა ხელი.

სანაცვლოდ The Walking Dead-ის ავტორები ერთგულ გულშემატკივრებს ჰპირდებიან, რომ ფინალური სეზონი ჩვეულებრივზე უფრო ხანგრძლივი იქნება — მასში სულ 24 ეპიზოდი იქნება. ამ სეზონის პრემიერა 2021 წლის ბოლოს შედგება და 2022 წელს გამოვა ფინალური ეპიზოდები, რითიც მეთერთმეტე სეზონთან ერთად მთელი შოუც დასრულდება.

ამავდროულად, დაგეგმილია მეათე სეზონის ექვსი ახალი ეპიზოდის გადაღება. შესაბამისად, წინ სულ ახალი 30 სერია გველოდება, სანამ ამდენწლიანი ისტორიის მქონე შოუ საბოლოოდ გადალახავს ფინიშის ხაზს.

ფოტო: AMC

მართალია, The Walking Dead სრულდება, თუმცა მის შემქმნელებს კარგად ესმით, თუ რამდენად ბევრი მაყურებელი ჰყავს ამ პროექტს და ფინალური სეზონის დაანონსებასთან ერთად სასიხარულო ცნობაც გაავრცელეს — ამავე სამყაროს შესახებ სპინოფსერიალს იღებენ.

ჯერჯერობით უცნობია მომავალი პროექტის სახელწოდება და სცენარის დეტალები, თუმცა გავრცელებული ინფორმაციის თანახმად, ახალი შოუ ძირითადად პერსონაჟების, დერილ დიქსონისა და კეროლ პელეტის ირგვლივ განვითარდება, რომელთა როლებს მსახიობები ნორმან რიდუსი და მელისა მაკბრაიდი ასრულებენ.

ამ ახალი შოუს პრემიერა The Walking Dead-ის დასრულებიდან ერთი წლის შემდეგ, 2023 წელსაა დაგეგმილი.