ევროპული საქართველოს მაჟორიტარობის კანდიდატი საჩხერის, ჭიათურისა და ხარაგაულის ოლქში, სერგო რატიანი, განათლების სამინისტროს გადაწყვეტილებას ეხმაურება დირექტორების გათავისუფლების შესახებ.

სერგო რატიანის თქმით, განათლების სამინისტრომ მიიღო გადაწყვეტილება, რომ გაეთავისუფლებინა ის დირექტორები, რომელთაც გაუვიდათ ექვსწლიანი დირექტორობის ვადა. რატიანმა აღნიშნა, რომ ხელისუფლებამ აამუშავა დირექტორებზე დასჯის გეგმა. რატიანის თქმით, ეს არის ზეწოლა მასწავლებლებზე და მეორდება ამბავი, რომელიც მოხდა ია კერზაიაზე.

სერგო რატიანის თქმით, ეს ამბავი აჩვენებს, თუ რამდენად ეშინია ხელისუფლებას ამ არჩევნების.

"გუშინ განათლების სამინისტრომ დაწერა ბრძანება და გაანთავისუფლა ის დირექტორები, რომლებსაც დირექტორობის 6-წლიანი ვადა გაუვიდათ. მიზეზად დასახელდა ის, რომ თითქოს პანდემიის გამო მათ ვერ მოახერხეს გამოცდების ჩაბარება და ამიტომ ყველა მათგანი გაანთავისუფლეს. წინასაარჩევნოდ ხელისუფლებამ სკოლის დირექტორების დასჯის გეგმა აამუშავა. გუშინვე სამინისტრომ დანიშნა მოვალეობის შემსრულებლად სამინისტროს გადაწყვეტილებით შერჩეული კადრები. ეს ფაქტობრივი დადასტურებაა, რომ სამინისტრომ დასაჯა პოლიტიკურად მმართველი გუნდის "ურჩი" პროფესიონალები. რაც მთავარია, ეს არის გაკეთებული იმისათვის, რომ ზეწოლა განახორციელონ დირექტორებზე, მეორდება ის საშინელი ამბავი, რომელიც მოხდა ია კერზაიაზე, როდესაც დირექტორზე ხდება ზეწოლა. ეს არის სამარცხვინო ამბავი, რომელზეც საზოგადოებამ უნდა აიმაღლოს ხმა და ეს ჩვენ არ უნდა დავუშვათ. დირექტორები უნდა იყვნენ თავისუფალი თავის არჩევანში და ესეც აჩვენებს იმას, თუ რამდენად ეშინია ამ ხელისუფლებას ამ არჩევნების", — განაცხადა სერგო რატიანმა