ჟურნალისტი მერაბ მეტრეველი, რომელსაც ამ დრომდე ტელეკომპანია კავკასიაზე ტოქშოუ ბარიერი მიჰყავდა, პოლიტიკურ საქმიაობას პაატა ბურჭულაძის პარტიაში იწყებს. ამის შესახებ მეტრეველი კვირის პალიტრაში გამოქვეყნებულ წერილში წერს.

„ეს არ იყო იოლი გადაწყვეტილება. უპირველესად იმიტომ, რომ იმას ანებებ თავს, რასაც ამდენი ხანი აკეთებდი, ყველაფერს ცვლი და ახალ საქმეს იწყებ. კიდევ იმიტომ, რომ საქართველო, ალბათ, ერთადერთი ქვეყანაა, სადაც ადამიანი შეიძლება მხოლოდ იმიტომ გალანძღონ, რომ პოლიტიკაში წავიდა. პოლიტიკოსობა ჩვენს ქვეყანაში ცუდთან ასოცირდება. ”აუ, რა უნდა, თავს რატომ იფუჭებს?!”, ”პოლიტიკა ბინძური საქმეა!”. იცით, რატომ არის პოლიტიკა ბინძური საქმე? იმიტომ, რომ პატიოსანი და ღირსეული ადამიანები თქვენსავით ფიქრობენ და პოლიტიკაში არ მიდიან, შედეგად კი ასპარეზი სხვებს რჩებათ. ჩემი აზრით, პოლიტიკაში უნდა წავიდეს ის, ვისაც გული ერჩის და ფიქრობს, რომ შეუძლია, ქვეყნისთვის სასიკეთო საქმე აკეთოს. ეს არ არის პათეტიკა, ეს სურვილია”, - წერს მეტრეველი.

მერაბ მეტრეველი თავის წერილში პაატა ბურჭულაძეზეც საუბრობს: „პაატა ბურჭულაძესაც იმავეს საყვედურობენ - კარგი მომღერალია, ქველმოქმედი, ყველას უყვარს, რა უნდა პოლიტიკაშიო. ყველა გაიძახის, მოგვბეზრდა ერთი და იგივე ხალხი, ახალი სახეები სჭირდება პოლიტიკასო და თუ ვინმე გამოჩნდა, მაშინვე ვეტაკებით - რა გინდა პოლიტიკაშიო. იქნებ გავარკვიოთ, ბოლოს და ბოლოს, რა გვინდა“.

მერაბ მეტრეველის მოსაზრებით, მითია ოცნების განცხადება იმის თაობაზე, რომ პაატა ბურჭულაძე ნაციონალური მოძრაობის სატელიტია: „ზღაპრებს ნუ დაიჯერებთ. ჩემი ადგილი არასდროს იქნება ნაციონალების გვერდით“.