დილით სოფელ სხვიტორში ზაბახიძეების ოჯახს ეზოში ნამდვილი ზამთრის მშვენება, შველი დახვდა, რომელიც ტყეში დაბრუნებას ვერ ახერხებდა.

ოჯახის წევრმა მირიან ზაბახიძემ ეს ფაქტი 112-ის სამსახურს აცნობა. როგორც ჩანს, შველმა სწორად აირჩია, ვის ოჯახში მისულიყო. მირიან ზაბახიძემ თქვა, რომ მას სხვაგვარად მოქცევა არც უფიქრია:

"როგორ დავკლავდი - ის ხომ ჩემი საახალწლო მეკვლეა!"

მომდევნო რეაგირებისთვის ინფორმაცია საჩხერის მუნიციპალიტეტის გამგეობას გადაეცა.

"სავარაუდოდ შველმა ტყიდან სოფლამდე სამ კილომეტრამდე მანძილი გვიან ღამით გაიარა, რადგან ცხოველის დაუძლურების გამო ტყეში მის სიცოცხლეს საფრთხე შეექმნებოდა, ამიტომ გადაწყდა, რომ შველი დროებით სოფელ სარეკში დაბინავდეს. გამოჯანმრთელების და ამინდის გაუმჯობესებისთანავე შველს კვერეთის ტყეში დააბრუნებენ" - ამბობენ საჩხერის გამგეობაში.

შველი გურამ აბრამიშვილის ფერმაში იცხოვრებს. ის სარეკში გამგებლის წარმომადგენელის პოზიციაზე მუშაობს და მას ხოხბების ფერმაც აქვს, სადაც ამ ეტაპზე სამი სახეობის 50-მდე ხოხობს უვლის.