ხეჩინაშვილის კლინიკის ექიმის განცხადებით, ფილარმონიასთან აფეთქების შედეგად დაშავებული ერთი პირი მათ კლინიკაშია მოთავსებული. ექიმის ინფორმაციით, პაციენტის მდგომარეობა სტაბილურია და მის სიცოცხლეს საფრთხე არ ემუქრება.

"იგი გააგრძელებს სტაციონარულ პირობებში მკურნალობას. მდგომარეობის გართულებას არ ველოდებით. პაციენტს მძიმე დაზიანებები არა აქვს", — აღნიშნავს ექიმი.

შინაგან საქმეთა სამინისტროში აცხადებენ, რომ კლუბ დეჟა ვუში აფეთქება, სავარაუდოდ, ჟანგბადის ბალონის აფეთქებამ გამოიწვია. აფეთქების შედეგად 3 ადამიანი დაშავდა, ერთი კაცი კი დაზიანებების გამო გარდაიცვალა. 2 დაშავებული რესპუბლიკურ საავადმყოფოსა და ალადაშვილის კლინიკაში არის გადაყვანილი. ერთის მდგომარეობა მძიმეა, მეორე სტაბილურადაა.

გამოძიება სისხლის სამართლის კოდექსის 240-ე მუხლის მე-2 ნაწილით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს, რამაც სიცოცხლის მოსპობა გამოიწვია.