თამარ ბაჩალიაშვილის დედა მოითხოვს, რომ პროკურატურამ ამერიკის გამოძიების ფედერალურ ბიუროსთან მიმოწერა გაასაჯაროოს. ასე ეხმაურება ის პროკურატურის დღევანდელ განცხადებას იმის შესახებ, რომ FBI გამოძიებაში ვერ ჩაერთვება

"დამიდონ სატელიტების ჩანაწერები, იდგა თუ არა მანქანა იქ. ასევე, რა წერილი მისწერეს FBI-ს. იქნებ, სულაც მიწერეს, რომ თვითმკვლელობაა და იმიტომ არ ერთვება. იმათი პასუხიც მითხრან. დადონ "ფლეშკები", რაშიც არის ყველაფრის პასუხი", — განაცხადა თეონა თამაზაშვილმა.

მისივე თქმით, არ ენდობა არც გამოძიებას, არც ექსპერტიზის საბოლოო დასკვნას, რომლის თანახმადაც, გარდაცვლილ თამარ ბაჩალიაშვილის სხეულში სხვადასხვა პრეპარატის შემცველი ნივთიერებები აღმოჩნდა. თამაზაშვილის განცხადებით, შესაძლოა, თამარმა აღნიშნული მედიკამენტები იძულებით იყიდა.

პროკურატურამ გაასაჯაროვა ვიდეოკადრებიც, რომლებშიც მათი თქმით, ასახულია, როგორ ყიდულობს ბაჩალიაშვილი ამ მედიკამენტებს. მათივე თქმით, გამოძიებით დადგენილია, რომ 17 ივლისს ბაჩალიაშვილი გუგლში ეძებდა ინფორმაციას ამ მედიკამენტების შესახებ.

უწყებაში, ასევე, აღნიშნავენ, რომ ტრასოლოგიური ექსპერტიზის დასკვნის თანახმად თამარ ბაჩალიაშვილის ტანსაცმელზე მექანიკური ზემოქმედებისთვის დამახასიათებელი დაზიანება არ აღინიშნება.