საქართველოს პრეზიდენტი სალომე ზურაბიშვილი აცხადებს, რომ ლუგარის ცენტრზე განხორციელებული კიბერთავდასხმის მიზანი მხოლოდ ლაბორატორიის პარალიზება არ ყოფილა და ეს, ერთი მხრივ, საქართველოს დაშინების მორიგი მცდელობა იყო. პრეზიდენტის თმქით, ეს "ანტიჰუმანურ აქტად უნდა შეფასდეს".

"ნიშანდობლივია და მთელ რიგ კითხვებს ბადებს თავდასხმისთვის შერჩეული დრო და ის უსუსური მინიშნებები და მცდელობები, რაც პასუხისმგებლობის თავიდან აცილების მიზნით გამოიყენა რუსულმა მხარემ ალექსეი ნავალნის მოწამვლისას გამოყენებული ნივთიერების წარმომავლობასთან დაკავშირებით", — ვკითხულობთ პრეზიდენტის მიერ გავრცელებულ ოფიციალურ განცხადებაში.

სალომე ზურაბიშვილი ყველა შესაბამის სტრუქტურას მოუწოდებს, უახლოეს დროში გამოიძიონ ლუგარის ცენტრზე განხორციელებული თავდასხმა.

2 სექტემბერს გერმანიის მთავრობამ განაცხადა, რომ რუსი ოპოზიციონერი, ალექსეი ნავალნი რუსეთში სწორედ "ნოვიჩოკის" ტიპის საწამლავით მოწამლეს. ეს არის ქიმიური ნივთიერება, რომელიც ნერვიულ სისტემას ანადგურებს.

ამ ინფორმაციის საპასუხოდ, რუსეთის დუმის დეპუტატი ამტკიცებს, რომ ეს ნივთიერება საქართველოსა და აშშ-ში მზადდება. პროსახელისუფლებო მედიის, რიას ინფორმაციით, ამის შესახებ დეპუტატმა მათ განუცხადა.

ამასთან, 3 სექტემბერს საქართველოს შინაგან საქმეთა სამინისტრომ გაავრცელა ინფორმაცია, რომ ჯანდაცვის სამინისტროს კომპიუტერულ სისტემაზე უცხო ქვეყნის სპეცსამსახურების მიერ კიბერშეტევა განხორციელდა. უწყებაში აღნიშნეს, რომ მართლსაწინააღმდეგოდ დაეუფლნენ ლუგარის ლაბორატორიის მონაცემებსაც, რაც ამ დროისთვის ერთ-ერთ უცხოურ ვებ-გვერდზე ხელმისაწვდომია. შსს არ აკონკრეტებს, რომელი ქვეყნის სპეცსამსახურებზე საუბრობს.

ამავე თემაზე: