დაავადებათა კონტროლის ცენტრის ხელმძღვანელის, ამირან გამყრელიძის თქმით, არ ჰგონია, რომ ლუგარის ლაბორატორიაზე კიბერშეტევის მიზეზი ინფორმაციის ინტერესი ყოფილიყო. მისი განმარტებით, მათი ყველა ინფორმაცია გამჭვირვალე და ხელმისაწვდომია.

"უბრალოდ, ვფიქრობ, გუშინ, რომ გამოჩნდა ეს ვითომ "ნოვიჩოკი" მზადდება სადღაც და, მათ შორის, ეს ლაბორატორიაც დასახელდა, კიდევ გამოხმაურებები ნავალნის მოწამვლასთან დაკავშირებით. ვფიქრობ, რომ მორიგი გაღვივებაა არსებული თემის", — აცხადებს გამყრელიძე პალიტრანიუსის ეთერში.

ამირან გამყრელიძე, ასევე, მიიჩნევს, რომ მიზეზი იმისა, თუ რატომ აღელვებს რუსეთს ლუგარის ლაბორატორია, ამერიკისა და საქართველოს მჭიდრო პარტნიორობა და ისაა, რომ ამერიკა საქართველოს წინსვლას ხელს უწყობს.

"ეს არის ტიპური პოლიტიკა და მხოლოდ და მხოლოდ ეჭვი იმაზე, თუ რატომ თანდათან საქართველო გამოდის იმ ორბიტიდან, სადაც ჩვენ ვიყავით 30 წლის წინ და არის უკვე სხვა ორბიტაზე, რომელიც არის დასავლეთის ორბიტა", — ამბობს გამყრელიძე.

3 სექტემბერს საქართველოს შინაგან საქმეთა სამინისტრომ გაავრცელა ინფორმაცია, რომ ჯანდაცვის სამინისტროს კომპიუტერულ სისტემაზე უცხო ქვეყნის სპეცსამსახურების მიერ კიბერშეტევა განხორციელდა. უწყებაში აღნიშნეს, რომ მართლსაწინააღმდეგოდ დაეუფლნენ ლუგარის ლაბორატორიის მონაცემებსაც, რაც ამ დროისთვის ერთ-ერთ უცხოურ ვებ-გვერდზე ხელმისაწვდომია. შსს არ აკონკრეტებს, რომელი ქვეყნის სპეცსამსახურებზე საუბრობს.