დაავადებათა კონტროლის ცენტრის ხელმძღვანელის მოადგილე, პაატა იმნაძე ამბობს, რომ ლუგარის ლაბორატორიაზე კიბერთავდასხმის არ ეშინია, რადგან "იქ არაფერი საიდუმლო ექსპერიმენტები" მათ არ ჰქონდათ, ამიტომ ისინი "ვერაფერს მოიპარავდნენ".

"მეორეც ერთი, მე ძალიან არ მაწუხებს ქვეყნის გარედან [თავდასხმა]. მიჩვეული ვარ მაგას. მე ის მაწუხებს, რომ ქვეყნის შიგნიდან გვიტევენ. გარედანაც და შიგნიდანაც ერთნაირად გვიტევენ და მიჩვეულები ვართ. ჩვენ მაგისთვის არ გვცალია, კოვიდს ვებრძვით", — განაცხადა პაატა იმნაძემ რუსთავი 2-ის ეთერში.

დღეს, 3 სექტემბერს საქართველოს შინაგან საქმეთა სამინისტრომ გაავრცელა ინფორმაცია, რომ ჯანდაცვის სამინისტროს კომპიუტერულ სისტემაზე უცხო ქვეყნის სპეცსამსახურების მიერ კიბერშეტევა განხორციელდა. უწყებაში აღნიშნეს, რომ მართლსაწინააღმდეგოდ დაეუფლნენ ლუგარის ლაბორატორიის მონაცემებსაც, რაც ამ დროისთვის ერთ-ერთ უცხოურ ვებ-გვერდზე ხელმისაწვდომია. შსს არ აკონკრეტებს, რომელი ქვეყნის სპეცსამსახურებზე საუბრობს.