დაავადებათა კონტროლის ცენტრის დირექტორის, ამირან გამყრელიძის განცხადებით, პირი, რომელსაც ჩაქვში, სასტუმრო ოაზისში კორონავირუსით ინფიცირება დაუდასტურდა სამედიცინო სფეროს წარმომადგენელია.

"ერთ-ერთ ჩემს კოლეგას, რომელიც კონტაქტში იყო ინფიცირებულთან ქუთაისში, დაუდგინდა სიმპტომები. სულ დღე-ნახევარი იყო სასტუმროში, გამოუვლინდა სიმპტომები, გადაყვანილი იყო ცხელების ცენტრში და იქ დადგინდა კორონავირუსული ინფექცია", — განაცხადა მან ფორმულას ეთერში.

გამყრელიძის განცხადებით, მის კოლეგა ექიმებს მეტი სიფრთხილე მართებდათ. ასე ეხმაურება ის იმ ფაქტს, რომ სასტუმრო ოაზისში, სადაც კორონავირუსით ინფიცირების შემთხვევა გამოვლინდა, 200 ექიმი იყო შეკრებილი.

2 სექტემბრის მონაცემებით, საქართველოში კორონავირუსის 38 ახალი შემთხვევა გამოვლინდა, დადასტურებული შემთხვევებიდან კი 5 პირის წყარო უცნობია.

ჯამში, საქართველოში კორონავირუსის დადასტურებულ შემთხვევათა რაოდენობა 1 548-მდე გაიზარდა, გამოჯანმრთელებულია 1 270 ადამიანი, გარდაცვლილი კი — 19. კარანტინის რეჟიმში რჩება 6 059 პირი, სტაციონარში მეთვალყურეობის ქვეშ კი 239 პაციენტია.