ბელარუსში სტუდენტებმა სასწავლო წლის დაწყებას ბოიკოტი გამოუცხადეს და მარში გამართეს. ამის შესახებ გამოცემა Reuters-მა დაწერა.

ამ პროტესტით სტუდენტები ტიხანოვსკაიას გამოეხმაურნენ, რომელმაც ახალგაზრდებს ხელახალი არჩევნებისა და ლუკაშენკოს გადადგომის მოთხოვნისკენ მოუწოდა.

სტუდენტები ქუჩაში ოპოზიციური დროშებით გადაადგილდებოდნენ და ლუკაშენკოს გადადგომის მოთხოვნაზე ხელმოწერებს აგროვებდნენ. გამოცემის ცნობით, სოციალურ ქსელში გავრცელებულ ვიდეო კადრებში ჩანს, რომ რამდენიმე სტუდენტი დააკავეს.

ტიხანოვსკაიას გუნდი კი აცხადებს, რომ ბოიკოტი აუცილებელი იყო იმისთვის, რომ "ეჩვენებინათ, ახალგაზრდები ბელარუსში მიმდინარე მოვლენებს ვერ გაემიჯნებიან".

ლუკაშენკოს გადადგომის მოთხოვნით აქციები 9 აგვისტოს დაიწყო. აქციები საპრეზიდენტო არჩვენების შედეგებს მოჰყვა, რომლის თანახმადაც, ალექსანდრე ლუკაშენკომ ხმების 80 პროცენტი მიიღო, ხოლო მისმა ოპონენტმა, სვეტლანა ტიხანოვსკაიამ — 10 პროცენტი.

არჩევნების შედეგების გასაპროტესტებლად გამოსული მოსახლეობა პოლიციამ რეზინის ტყვიებისა და წყლის ჭავლის გამოყენებით დაშალა. ხალხის ნაწილი დაშავდა, ათასობით ადამიანი კი პოლიციამ დააკავა. საპროტესტო აქციების დროს სამი ადამიანი გარდაიცვალა.