"განცდა მიჩნდება, რომ ვიღაც ფულს უხდის სააკაშვილს, როცა გაგიჭირდებათ, გამოვიდეს და სისულელეები ილაპარაკოს" — ასე მიმართა დამოუკიდებელმა დეპუტატმა, ბექა ნაცვლიშვილმა ქართული ოცნების დეპუტატებს. მისი თქმით, მმართველ გუნდში ბედნიერები არიან, რომ სააკაშვილი ისევ გამოჩნდა და ახლა მისგან "ბუას" შექმნა შეუძლიათ.

"პირდაპირ შემიძლია გითხრათ, რომ ბედნიერები ხართ, სააკაშვილი კიდევ რომ გამოჩნდა ასპარეზზე. ისევ, შესაბამისა, მთელი თქვენი ენერგიის, მთელი თქვენი ინტელექტუალური პოტენციალის კონცენტრირება მოხდა სააკაშვილზე. სააკაშვილი არის გაკოტრებული მორალურად, ინტელექტუალურად გაკოტრებული პოლიტიკოსი, კომიკური ფიგურაა უკვე. დაანებეთ თავი ბუას შექმნას სააკაშვილისგან და მოდით, ჩვენთან იყავით ოპონენტები", — განაცხადა მან პარლამენტში.

ნაცვლიშვილმა აღნიშნა ისიც, რომ სააკაშვილის საქართველოში არჩამოსვლის გარანტი არის ქართველი ხალხი და არა ქართული ოცნება.

27 აგვისტოს საქართველოს ყოფილმა პრეზიდენტმა, მიხეილ სააკაშვილმა საკუთარ ფეისბუქგვერდზე ვიდეომიმართვა გაავრცელა, სადაც ის ამომრჩეველს ისევ ჩამოსვლას ჰპირდება, თუმცა ამჯერად არ აკონკრეტებს როდის. მმართველი გუნდის წარმომადგენლებმა ვიდეომიმართვის საპასუხოდ განაცხადეს, რომ მიხეილ სააკაშვილს დაბრუნების შემთხვევაში საქართველოში მართლმსაჯულება დახვდება.