მინსკში მიმდინარე აქციების დროს დაკავებულ ფეხბურთელებს ძალოვანებმა სცემეს, რის შედეგადაც ხერხემლის მოტეხილობა და მრავლობითი დაზიანება მიიღეს. ამის შესახებ ინფორმაცია Tvrain-მა გაავრცელა.

30 აგვისტოს ღამეს დაკავებული, კლუბ კრუმკაჩის ფეხბურთელები გაათავისუფლეს და თქვეს, რომ შეცდომით დაიჭირეს. აღსანიშნავია, რომ ისინი პოლიციის მიკროავტობუსზე თავდასხმის ბრალდებით დააკავეს. Tvrain-ის მიერ გავრცელებულ კადრებში კი ჩანს, რომ მიკროავტობუსს პოლიციის აღმნიშვნელი ნიშანი არ აქვს და არც შიგნით მსხდომ ადამიანებს აცვიათ პოლიციის ფორმა.

კლუბის პრეზიდენტის თქმით, ერთ-ერთი ფეხბურთელი ხერხემლის მოტეხილობით პოლიციის განყოფილებიდან საავადმყოფოში ბორკილებით გადაიყვანეს. კიდევ ერთ ფეხბურთელს კი თირკმლის დაჟეჟილობა, მუცლის დახურული დაზიანება და წელის არეში სისხლჩაქცევები აქვს.

ბელარუსში საპროტესტო გამოსვლები საპრეზიდენტო არჩევნებს მოჰყვა. გამოსვლები მას შემდეგ დაიწყო, რაც წინასწარი დათვლის შედეგად ცნობილი გახდა, რომ ალექსანდრ ლუკაშენკომ ხმების 80 პროცენტი მიიღო, ხოლო სვეტლანა ტიხანოვსკაიამ — 10 პროცენტი.

არჩევნების შედეგების გასაპროტესტებლად გამოსული მოსახლეობა პოლიციამ რეზინის ტყვიებისა და წყლის ჭავლის გამოყენებით დაშალა. ხალხის ნაწილი დაშავდა, ნაწილი პოლიციამ დააკავა. სამი ადამიანი გარდაიცვალა.