"სტრატეგია აღმაშენებელის" ლიდერი, გიორგი ვაშაძე ჭიათურის მაღაროში მომხდარი უბედური შემთხვევის შედეგად 46 წლის მემანქანის, კობა ჩაფიძის გარდაცვალების გამო მწუხარებას გამოთქვამს და დაღუპული ოჯახის წევრებსა და ახლობლებს უსამძიმრებს.

ვაშაძე ჭიათურის მაღაროში არსებულ მძიმე მდგომარეობაზეც საუბრობს და ხელისუფლებას "ჯორჯიან მანგანეზთან" გარიგებაში ადანაშაულებს.

"ეს არის მორიგი შემთხვევა, რომელმაც დაგვანახა თუ როგორ ილახება ადამიანთა უფლებები და რომ მათ უსაფრთხო გარემოში არ უწევთ მუშაობა. ამ შემთხვევაში მთავარი შრომის უსაფრთხოების კანონი კი არ არის, რომელიც ისედაც მკაცრია ქვეყანაში, არამედ პრობლემა, მაღაროს მმართველ კომპანიაშია, რომელიც გარიგებულია "დამსხვრეული ოცნებების" მთავრობასთან. კომპანია, რომელიც ძარცვავს მთელ ჭიათურას და ერთადერთი ინტერესი გააჩნია, რაც შეიძლება ბევრი ფული გააკეთოს მარგანეცის მოპოვებაში, სანაცვლოდ კი, არ ზრუნავს შრომის უსაფრთხოებაზე და ერთი ლარის ინვესტიციასაც კი არ ახორციელებს", — აცხადებს გიორგი ვაშაძე.

"სტრატეგია აღმაშენებელის" ლიდერის განცხადებით, მთავრობა ჩართულია ამ პროცესში და მარგანეციდან წილებს იღებს. მათივე თქმით, ხელისუფლება არანაირ ყურადღებას არ აქცევს ჭიათურის მაღაროში არსებულ იმ უმძიმეს მდგომარეობას, რომელშიც ხალხი მუშაობს.

"ასობით მილიონი ლარი ილექება კონკრეტული ადამიანის ჯიბეებში და კაპიკები იხარჯება მომუშავე პერსონალზე ხელფასის სახით. კატასტროფულ გარემოში უწევთ მუშაობა ჭიათურაში ადამიანებს. როგორც კი გავხდები ქვეყნის პრემიერმინისტრი, პირველ რიგში დავიცავთ თითოეული ჭიათურელის ინტერესს, ჭიათურ-მანგანუმის შემოსავლებიდან აუცილებლად წავა კონკრეტული თანხები ადგილობრივ ბიუჯეტში, ამას აუცილებლად გავაკეთებთ. ამასთან, არცერთ კომპანიას არ ექნება უფლება დაარღვიოს კანონი და არ უზრუნველყოს შრომითი უსაფრთხოების სტანდარტები, რაც აუცილებელია", — განაცხადა ვაშაძემ.

მისივე თქმით, არსებული ფინანსური რესურსი ადგილობრივმა მოსახლეობამ უნდა მოიხმაროს. ვაშაძე პირობას დებს, რომ პრემიერმინისტრად გახდომის შემთხვევაში დიდი კორუფციული სქემა, რომლითაც ჭიათურის მანგანუმში ხელმძღვანელობენ, ერთხელ და სამუდამოდ დაიშლება, შემოსავლები კი ქართველი ოჯახების ბიუჯეტს შეავსებს.