გერმანიაში აცხადებენ, რომ მზად იქნება ოპოზიციონერ ალექსეი ნავალნის გამო რუსეთს დიპლომატიური სანქციები დაუწესონ, თუ დარწმუნდებიან, რომ ამის უკან რუსეთის ხელისუფლება დგას.

ამის შესახებ გერმანიის საგარეო საქმეთა მინისტრმა, ჰაიკო მაასმა ისაუბრა და პარალელი ბერლინში ზელიმხან ხანგოშვილის მკვლელობასთან გაავლო.

"რაც შეეხება რუსეთის მზადყოფნას, რომ ნათელი მოჰფინოს ალექსეი ნავალნის საქმეს, ჩვენ ისევე ვიმოქმედებთ, როგორც ტირგარტენის პარკში მკვლელობისას", — აღნიშნა მაასკმა.

ამასთან, გერმანიის კანცლერმა, ანგელა მერკელმა განაცხადა, რომ მას შემდეგ, რაც უფრო მეტი დეტალი გახდება ცნობილი, შესაძლებელი იქნება საერთო ევროპული რეაქციის ფორმულირება. მან სკრიპალების მოწამვლის საქმე გაიხსენა, როცა დიდმა ბრიტანეთმა და კიდევ 30-მდე ქვეყანამ რუსი დიპლომატები გააძევა.

"ეს არაა გერმანიის პრობლემა, თუმცაღა გერმანიამ ნავალნი მიიღო", — თქვა კანცლერმა.

კორუფციასთან ბრძოლის ფონდის ხელმძღვანელი, ალექსეი ნავალნი ომსკის საავადმყოფოში, 20 აგვისტოს მოათავსეს. ის ამ დრომდე უგონო მდგომარეობაში იმყოფება. ნავალნი საავადმყოფოში მას შემდეგ მოხვდა, რაც ტომსკი-მოსკოვის რეისზე თავი შეუძლოდ იგრძნო. ავიალაინერში მასთან ერთად მყოფი პრესმდივნის თქმით, ის, მოწამლეს. იარმიში ასევე ამბობს, რომ დილით ნავალნიმ მხოლოდ ჩაი დალია.

თავდაპირველად ნავალნი ომსკის კლინიკაში მოათავსეს, სადაც თქვეს, რომ მის ორგანიზმში რაიმე საეჭვო ნივთიერება ვერ იპოვეს.

22 აგვისტოს ნავალნი სპეცთვითმფრინავით რუსეთიდან გერმანიაში გადაიყვანეს. ექიმებმა დაადასტურეს, რომ საქმე "შესაძლო" მოწამვლასთან იყო. დღემდე კლინიკის მახლობლად პოლიციის რამდენიმე ავტობუსი და 10-მდე სამართალდამცავი მორიგეობს, რომლებიც პერიმეტრზე 2-5 კაციანი ჯგუფით გადაადგილდებიან.

ალექსეი ნავალნის მოწამვლის საქმის გამოძიება მოითხოვეს გერმანიის კანცლერმა, ანგელა მერკელმა და ევროკავშირის უმაღლესმა წარმომადგენელმა, ჟოზეფ ბორელმა. აღნიშნულ განცხადებას აშშ-ს სახელმწიფო მდივანი, მაიკ პომპეოც შეუერთდა. გამოძიების მხარდაჭერის მზაობა გამოთქვა დიდი ბრიტანეთის პრემიერმინისტრმა, ბორის ჯონსონმა.

რუსეთის დუმის კომიტეტმა გამოძიება დაიწყო, თუმცა მათ გადაწყვიტეს, რომ ოპოზიციონერის მოწამვლაში საგარეო ჩარევა ეპოვათ. თვითონ რუსეთს პრეზიდენტი ვლადიმერ პუტინი კი ამტკიცებს, რომ ობიექტური გამოძიების მომხრეა.