კულტურის სამინისტროში ადასტურებენ ინფორმაციას, რომ მიხეილ გიორგაძეს ტელეფონით დაუკავშირდნენ უკრაინის კულტურის მინისტრის სახელით და სთხოვეს, მხარი დაეჭირა უკრაინის წარმომადგენლისთვის ევროვიზიის კონკურსზე.

გუშინ, 14 აპრილს, რუსულ ტელეარხ НТВ-ს ეთერში გასულ გადაცემაში, საქართველოს კულტურის მინისტრთან ჩაწერილი სატელეფონო საუბარი გაუშვეს. არხის წარმომადგენელი გიორგაძეს გაეცნო როგორც უკრაინის კულტურის მინისტრი და სთხოვა, საქართველოს უმაღლესი ქულით მხარი დაეჭირა უკრაინელი შემსრულებლისთვის ევროვიზიის კონკურსზე.

მიხეილ გიორგაძემ უპასუხა, რომ ის ამის თაობაზე პირველი არხის ხელმძღვანელობას დაელაპარაკებოდა: "მინდა გითხრათ, რომ ტრადიციულად, საქართველოს მხრიდან მხარდაჭერა საკმაოდ ინტენსიურია თუ მეხსიერება არ მღალატობს, მაგრამ ჩვენი პირველი არხის ხელმძღვანელსაც დაველაპარაკები, ვკითხავ როგორ შეიძლება კიდევ ცოტათი ამ მხარდაჭერის გაძლიერება და ცხადია, ვთხოვ მას ამის გაკეთებას. ის ჩემი კარგი მეგობარია".

კულტურის სამინისტროში On.ge-ს განუცხადეს, რომ აღნიშნული ზარი ნამდვილად შედგა და მინისტრმა მხოლოდ პოლიტკორექტულობის ფარგლებში გასცა პასუხი:

"მინისტრი ნამდვილად დარწმუნებული იყო, რომ იგი თავის უკრაინელ კოლეგას ესაუბრებოდა. ორ მინისტრს შორის საუბარი წარიმართა პოლიტკორექტულობის ფარგლებში და თხოვნაზე იყო დიპლომატიური პასუხი, თორე რაიმეს დაპირება, ან მსგავსი არ ყოფილა. საუბარშიც ჩანს, რომ თვითონ შეთავაზებაც მოულოდნელი და უცნაური იყო მინისტრისთვის, რადგან, როგორც წესი, საქართველო უკრაინელ კოლეგებს ყოველთვის მაღალი ქულით აფასებს".

გუშინ, 14 მაისს, ევროვიზია 2016 წლის გამარჯვებული 534 ქულით უკრაინის წარმომადგენელი ჯამალა გახდა. მეორე ადგილზე გავიდა ავსტრალია, მესამე – რუსეთი. ქართველმა მონაწილეებმა, ნიკა კოჩაროვმა და Young Georgian Lolitaz–მა, მე–20 ადგილი დაიკავეს.