პოლიტიკურ პარტიათა კოალიცია ძალა ერთობაშიას განცხადებით, გიორგი ვაშაძეს ისნის მაჟორიტარული ოლქის არჩევნებში მონაწილეობა მათი ფორმატის სახელით უნდა მიეღო. მათივე ინფორმაციით, ვაშაძემ, ასევე, საბურთალოს ოლქში წარადგინა კანდიდატი, რომელზეც კონსესუსი არ ყოფილა.

"ამავე დროს, გიორგი ვაშაძე სხვადასხვა პირთან კომუნიკაციაში აცხადებდა, რომ გაერთიანებიდან ძალა ერთობაშიას გასვლა შეთანხმებული იყო, რაც მცდარ ინფორმაციას წარმოადგენს. ასე, რომ სხვა პოლიტიკურმა სუბიექტმა შეთანხმება დაარღვია და სტრატეგიული ტყუილით ამომრჩეველში დაბნეულობის შეტანას ცდილობს. ჩვენ კი შეთანხმების ერთგულები ვრჩებით და სხვა ოპოზიციური პარტიების მიერ წარდგენილ კანდიდატებს ვაკის, მთაწმინდის, ნაძალადევისა და დიდუბე-ჩუღურეთის ოლქში აქტიურად ვუჭერთ მხარს", — აცხადებენ ძალა ერთობაშიაში.

მათვე განცხადებით, საერთო ოპოზიციური ფრონტის შესაქმნელად და მომაბეზრებელი საარჩევნო ბუღალტერიის დასასრულებლად ერთიანმა ნაციონალურმა მოძრაობამ ნაბიჯები, ჯერ კიდევ 3 თვის წინ გადადგა და მაჟორიტარულ არჩევნებში თბილისის 8 ოლქიდან 6-ში მონაწილეობაზე უარი თქვა.

27 ივლისს გიორგი ვაშაძემ და თაკო ჩარკვიანმა პოლიტიკურ პარტიათა კოალიცია ძალა ერთობაშია დატოვეს და ახალი პოლიტიკური პლატფორმა სტრატეგია აღმაშენებელი წარადგინეს. მათი განცხადებით, სტრატეგია აღმაშენებელი ამ ეტაპზე კიდევ ორ სუბიექტს — ახალი საქართველო და კანონი და სამართალს აერთიანებს.