პირველი საუნივერსიტეტო კლინიკის დირექტორის, ლევან რატიანის თქმით, შატილში მომხდარი ავარიის დროს გადარჩენილი სამ პირის ნევროლოგიური სტატუსი გაუმჯობესებულია.

"ამ ეტაპზე მოხსნილია მწვავე რესპირატიული დისტრეს სინდრომის დიაგნოზი. ორ მათგანთან მოხსნილია ტრამვულ ჰემორაგიული შოკის დიაგნოზი, ნევროლოგიური სტატუსი გაუმჯობესებულია. იმედია, ასეთი დადებითი კლინიკით გაგრძელდება მათი გამოჯანმრთელება", — აცხადებს კლინიკის დირექტორი.

ავტოსაგზაო შემთხვევა დუშეთის მუნიციპალიტეტში, სოფელ ბისოს სიახლოვეს, შატილის გზაზე მოხდა. სამგზავრო მიკროავტობუსი, დაახლოებით, 80 მეტრის სიმაღლიდან კლდოვან ფერდობზე გადავარდა. გარდაიცვალა 17 ადამიანი, 3 კი მძიმედ დაშავდა. შინაგან საქმეთა სამინისტრომ მომხდარ ფაქტზე გამოძიება საქართველოს სისხლის სამართლის კოდექსის 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.