იუსტიციის მინისტრი, თეა წულუკიანი ამბობს, რომ მიხეილ სააკაშვილის საქართველოში დაბრუნებას მიესალმება, რადგან "თუ ექსპრეზიდენტი ძალებს იპოვის" და დაბრუნდება, მას საზღვარზევე დაკავების პროცედურები ელოდება. ასე ეხმიანება იგი სააკაშვილის ვიდეომიმართვას, სადაც ყოფილი პრეზიდენტი საქართველოში დაბრუნებას ჰპირდება ამომრჩეველს.

"ჩვენ, რა თქმა უნდა, მივესალმებით, ის თუ საქართველოში იპოვის ძალებს და საქართველოში ჩამოვა, მას, რა თქმა უნდა, ელოდება დაკავების პროცედურა საზღვარზევე და, რა თქმა უნდა, ქართული საპატიმრო, ვინაიდან ის არის ძებნილი და მის მიმართ დამდგარია არაერთი ინსტანციის მიერ განაჩენები, რომელიც მან მერე შესაძლოა გადაასინჯინოს, როდესაც უკვე ქართულ საპატიმროში იქნება", — აცხადებს წულუკიანი.

ექსპრეზიდენტმა, მიხეილ სააკაშვილმა ვიდეომიმართვა გაავრცელა, რომელშიც საქართველოს მოსახლეობას "ძალიან მძიმე შეცდომების" გამო ბოდიში მოუხადა. ის ისევ დაპირდა ამომრჩეველს დაბრუნებას, თუმცა წინა დაპირებებისგან განსხვავებით, არ დააკონკრეტა როდის.