ვისკონსინის შტატის ქალაქ კენოშაში საპროტესტო აქციების მესამე რამე დარბევებითა და სროლით დასრულდა, რის შედეგადაც ორი პირი გარდაიცვალა, ხოლო ერთი დაშავდა. აქციები მას შემდეგ დაწყო, რაც აფროამერიკელ ჯეიკობ ბლეიკს პოლიციამ ზურგში რამდენჯერმე ესროლა.

პოლიციაში არ განუცხადებიათ, ვინ ვის დაესხა თავს და რა გახდა ამის მიზეზი. ადგილობრივი მედიასაშუალებები წერენ, რომ დაპირისპირება დემონსტრანტებსა და ბენზინგასამართი სადგურის დაცვის თანამშრომლებს შორის მოხდა. გარდა ამისა, გავრცელდა ვიდეოკადრები, სადაც ჩანს, რომ სამოქალაქო ტანსაცმელში გამოწყობილი პირები იარაღით სხვებს მისდევენ. კადრებში ჩანს და ისმის გასროლაც.

შერიფი დევიდ ბეთის თქმით, ბოლო პერიოდში ქუჩაში შეიარაღებული პირები "პატრულირებენ", თუმცა მას ჯერ არ აქვს ინფორმაცია, აქვს თუ არა მათ რაიმე კავშირი აღნიშნულ სროლასთან.

კომენდანტის საათის გამოცხადების მიუხედავად აქციის მონაწილეები სასამართლო შენობის ეზოში კვლავ შეიკრიბნენ. პოლიციამ მათ წინააღმდეგ რეზინის ტყვიები, ცრემლსადენი გაზი და შაშხანები გამოიყენა.

წინა ღამეებისგან განსხვავებით, ამ შემთხვევაში ქალაქში ცეცხლი არაფერს გასჩენია.

29 წლის ჯეიკობ ბლეიქი, რომელსაც შვილების თანდასწრებით პოლიციამ ზურგში ესროლა, პარალიზებულია. ბლეიქი საავადმყოფოში მძიმე მდგომარეობაში იმყოფება და ექიმებმა არ იციან შეძლებს თუ არა ის ოდესმე ისევ გავლას.

"მას შვიდჯერ ესროლეს, თითქოს მისი სიცოცხლე არაფერს წარმოადგენდა. თითქოს ჩემი შვილის სიცოცხლე მნიშვნელოვანი არ იყო, მაგრამ ჩემი შვილის სიცოცხლე ძალიან მნიშვნელოვანია. ის ცოცხალი არსებაა და მისი სიცოცხლეც ფასობს, — განაცხადა ჯეიკობის მამამ.

ვიდეოში, რომელიც თვითმხილველის მიერაა გადაღებული, ჩანს როგორ მისდევს სამი ოფიცერი ბლეიქს და შემდეგ ერთი როგორ ესვრის მას ზურგში მრავალჯერ მაშინ, როცა ის მანქანის კარს აღებს და სავარძელში ჯდება. მისი სამი შვილი, რომლებიც ამ დროს მანქანის უკანა სავარძელში ისხდნენ, მომხდარის თვითმხილველნი გახდნენ.

ბლეიქის ცოლმა, ლაქუიშა ბუქერმა, ასევე, განაცხადა, რომ პოლიციელები სროლით მასაც დაემუქრნენ, როცა მან შვილების უსაფრთხოების უზრუნველყოფა მოითხოვა.

სროლაში მონაწილე ოფიცრები, ადმინისტრაციულ შვებულებაში გაუშვეს და მათი ვინაობა, ჯერჯერობით, არ დაუსახელებიათ.